Tags-Khizan

ai ḳhizāñ vālo! ḳhizāñ vālo! koī socho ilaaj
ye bahāreñ paañv meñ zanjīr sī pahnā ga.iiñ

ḳhuub ḳhizāñ ko is kā pata hai hāl-e-zabūñ bhī merā judā hai
dosh-e-havā par uḌne vaale pattoñ sā behāl nahīñ maiñ

maanā ki thī ġhamgīn kalī ḳhauf-e-ḳhizāñ se
chup rah ke bahāroñ ne bhī dil toḌ diyā hai

ḳhizāñ-zāde shahroñ kā ruḳh kar rahe haiñ
gulābī hare niile piile

ham aise gul-zadgāñ ko bahār-e-yak-sā.at
nigār-ḳhāna-e-ahd-e-ḳhazāñ se achchhī hai

maiñ na hūñgā to ḳhizāñ kaise kaTegī terī
shoḳh patte ne kahā shāḳh se murjhāte hue

misāl-e-sub.h-e-bahār tū hai to maiñ huuñ shām-e-ḳhizāñ kī sūrat
chaman chaman ḳhār-o-ḳhas se mere faroġh hai tere rañg-o-bū kā

ḳhizāñ ke phuul sañjo.e kitāb meñ rakkhe
fasīl-e-ġham se yuuñ rishta bahāl rakkhā hai

ga.ī bāġh-e-jahāñ se ḳhalq ḳhālī haath le par tū
bahār-e-zindagī se zikr kā gul be-ḳhizāñ le jā

jis chaman meñ kabhī na aa.e bahār
us chaman kī ḳhizāñ bhī pyārī hai

ye jab bhī aa.ī laa.ī naved-e-bahār bhī
phir kyuuñ bahār se na ho pyārī ḳhizāñ mujhe

tasalsul pā.emālī kā milegā
sarīr-ārā ḳhizāñ hai kyā milegā

ai ḳhizāñ tū shauq ke saarā chaman barbād kar
chand phāñseñ chhoḌ jā merī rag-e-jāñ ke liye

hazār baar ḳhizāñ se bahār Takrā.ī
chaman kā raaz magar aaj tak khulā to nahīñ

ḳhizāñ nahīñ hai ba-juz ik taraddud-e-bejā
chaman khilāo agar zauq-e-bāġhbānī hai

ik sarzamīn-e-lāla bahār o ḳhizāñ meñ huuñ
yaksāñ hai dāġh-e-tāza o dāġh-e-kuhan mujhe

ḳhizāñ ke jaur-e-paiham kī shikāyat hai to donoñ ko
talabgār-e-bahārāñ haiñ udhar vo bhī idhar ham bhī

vo murġh-e-chaman haiñ ki bahār apnī ḳhizāñ hai
kaliyā.e par-o-bāl jab apne to jhaḌe phuul

us ko patā nahīñ hai ḳhizāñ ke mizāj kā
vo vāqif-e-bahār huā hai abhī abhī

ham haiñ hamārā shahr hai puḳhta makān hai
kuchh maqbare nasīb-e-ḳhizāñ ho ga.e to kyā