Tags-Khizan

ham-navā sab ḳhizāñ ke aate hī
aise patta hue patā na milā

ḳhizāñ meñ qafas se milī kyā rihā.ī
ḳhatāoñ kī saarī sazā dekh lī hai

mausam ḳhizāñ hī kā thā magar haal ye na thā
kaisī bahār aa.ī ki ashjār mar ga.e

ham saada hī aise the kī yuuñ hī pazīrā.ī
jis baar ḳhizāñ aa.ī samjhe ki bahār aa.ī

jab bahār aa kar guzar jā.egī ai sarv-e-bahār
ek rañg apnā bhī paivand-e-ḳhizāñ ho jā.egā

na gul khile na shagūfoñ pe tāzgī aa.ī
ḳhizāñ ke ba.ad chaman meñ bahār bhī aa.ī

ḳhizāñ kī āhaToñ par kāñptī haiñ pattiyāñ gul kī
bikharne ko hai ab zulf-e-bahārāñ ham na kahte the

ik shām-e-ḳhizāñ yahīñ kahīñ hai
ai sub.h-e-bahār yaad rakhnā

junūñ nahīñ hai ki chāk-e-dāman ko ābrū-e-bahār samjheñ
ḳhizāñ kī yalġhār meñ bhī hamdam ham apnā dāman siyā kiye haiñ

hai asliyat hai ḳhizāñ hī bahār kī tamhīd
bahār chāhe to andesha-e-ḳhizāñ se guzar

havā-e-zīst ko aanā hai jab tak aa.egī
bahār ban ke kabhī to kabhī ḳhizāñ kī tarah

kuchh rañg-e-ḳhizāñ ne bhī gul aise khilā.e haiñ
lahjoñ meñ kahīñ bhī to ra.anā.ī nahīñ baaqī

majāl kyā jo kisī gul ko chhū le bād-e-sumūm
ham apne tarz-e-amal se ḳhizāñ banāte haiñ

rafū ho jā.eñge chāk-e-bahārāñ
ḳhizāñ ke ghaav dekho mundamil haiñ

ḳhizāñ kā zahr saare shahr kī rag rag meñ utrā hai
galī-kūchoñ meñ ab to zard chehre dekhne hoñge

rañg-e-zard aur sarishk-e-surḳh to dekh
kyā ḳhizāñ meñ bahār hai merā

gah ḳhizāñ aa.ī gulistāñ meñ kabhī bād-e-bahār
sāmne āñkhoñ ke bande ke huā kyā kyā kuchh

bahār-e-be-ḳhizāñ dillī pe qurbāñ
nishāt-e-jāvedāñ dillī pe qurbāñ

har ek dāman-e-gul par falak ke aañsū haiñ
ḳhizāñ kī maut se yuuñ zīnat-e-bahār na ho

havā-e-garm ḳhizāñ meñ vo rañg-o-rūp kahāñ
thī andalīb yūñhī dhān-pān suukh ga.ī