Tags-Khizan

jis ne ḳhizāñ ko bhejā hai us ke paas bahār bhī hai
jis ne baaġh ujāḌā hai vo ḳhud phuul khilā.egā

mirā to farz chaman-bandi-e-jahāñ hai faqat
mirī balā se bahār aa.e yā ḳhizāñ guzre

bad-gumāñ mujh se na ai fasl-e-bahārāñ honā
merī aadat hai ḳhizāñ meñ bhī gul-afshāñ honā

tere dīvāne kyā bhalā jāneñ
kab ḳhizāñ aa.ī kab bahār aa.ī

ḳhush nahīñ aayā ḳhizāñ ko mirā uryāñ honā
zard patte mirī poshāk hue jaate haiñ

hazār qaid-e-ḳhizāñ se chhuT kar bahār kā aasrā kareñge
bahār bhī ham-qafas-zadoñ ko na raas aa.ī to kyā kareñge

ḳhizāñ sī chhā ga.ī nafrat kī har sū
chaman meñ phir se bikhrā.eñ mohabbat

asīrān-e-qafas ko vāsta kyā in jhameloñ se
chaman meñ kab ḳhizāñ aa.ī chaman meñ kab bahār aa.ī

jo āñkheñ dekh letī haiñ ḳhizāñ kā daur phir un se
bahāroñ kā fareb-e-rañg-o-bū khāyā nahīñ jaatā

maiñ shāḳh-e-zard ke mātam meñ rah gayā 'qaisar'
ḳhizāñ kā zahr shajar kī jaḌoñ meñ phailā thā

ḳhizāñ kā naam anjām-e-bahārāñ kī ḳhabar sun kar
gulistāñ se kināra-kash huā hai bāġhbāñ shāyad

ġhuncha-o-gul ko chauñkā ga.ī hai ḳhizāñ
fasl-e-gul ne chaman ko sañvārā nahīñ

kisī kā ḳhuun sahī ik nikhār de to diyā
ḳhizāñ ko tum ne libās-e-bahār de to diyā

ḳhizāñ kā daur chaman meñ nayā nahīñ hai magar
kalī kalī na tarastī thī tāzgī ke liye

zarā dekho to un utre hue chehroñ ko phūloñ ke
ma.āz-allāh jhoñkā hai ḳhizāñ kā yā ki selī hai

hameñ to mausam-e-gul ne hī kar diyā rusvā
sunā hai log salāmat ḳhizāñ meñ rahte haiñ

use bhī lagtā to hogā ki maiñ vahī huuñ, magar
ḳhizāñ-gazīda thakā sā udaas ranjīda

ḳhizāñ kā zikr hī kyā hai ki ai 'ravish' ham ne
bharī bahār guzārī hai gulistāñ se alag

ḳhuub mahke ḳhizāñ ke mausam meñ
zaḳhm khaa.e the jo bahāroñ se

ḳhizāñ ke ḳhushk patte jis meñ din-bhar khaḌkhaḌāte haiñ
isī mausam kā naam ab ke bahār-ījād rakkhā hai