Tags-Khuda

ḳhudā kare rahe jaarī payām-e-yār nisār
ki tere ba.ad ye hai terī yādgār nisār

yā-ḳhudā hazrat-e-ġhālib ko salāmat rakhnā
ab isī naam se baaqī hai nishān-e-dehlī

ḳhudā kā ghar tumhīñ samjho to samjho
hameñ to ye sanam-ḳhāne lage haiñ

na ho kyuuñ ġhairat-e-gul-zār vo kūcha ḳhudā jaane
lahū is ḳhaak par kin kin azīzoñ kā girā hogā

bhalā hogā kuchh ik ahvāl us se yā burā hogā
ma.aal apnā tire ġham meñ ḳhudā jaane ki kyā hogā

saath naaqa ke ḳhudā jaane kidhar ram kar ga.ī
gard-e-mahmil bhī na pahuñchī aah majnūñ kī taraf

kise ġharaz hai phir aap ko kyuuñ sanam kā bandā kahā kareñge
jo yūñhī ham ko bhulā.eñge vo to ham bhī yād-e-ḳhudā kareñge

ye sirf harfoñ kī tāb-kārī kā zahr kab hai
ḳhudā ke bando ye ham ġharīboñ kī shā.irī hai

baḳhshish ḳhudā kī hai to shafā.at rasūl kī
rakhtā huuñ darmiyān karīm o rahīm kā

chaman ko lag ga.ī kis kī nazar ḳhudā jaane
chaman rahā na rahe vo chaman ke afsāne

jis kī iimā pe kiyā shaiḳh ne bandoñ ko halāk
vahī bandoñ kā ḳhudā hai mujhe ma.alūm na thā

vā.iz-e-shahr ḳhudā hai mujhe ma.alūm na thā
yahī bande kī ḳhatā hai mujhe ma.alūm na thā

vo duniyā rashk-e-firdaus-e-barīñ ma.alūm hotī thī
ḳhudā kā shāhkār-e-behtarīñ ma.alūm hotī thī

gar mānte ho us ko ḳhudā mutma.in raho
jo bhī milā hai jitnā milā mutma.in raho

zindagī kā mazā nahīñ miltā
but mile to ḳhudā nahīñ miltā

ḳhudā ke haath meñ mat sauñp saare kāmoñ ko
badalte vaqt pe kuchh apnā iḳhtiyār bhī rakh

ḳhudī kī daulat-e-uzmā ḳhudā ne mujh ko baḳhshī hai
qalandar huuñ maiñ shāhoñ kī gadā.ī kar nahīñ saktā

merī tanhā.ī kī pagDanDī par
mere ham-rāh ḳhudā rahtā hai

ḳhudā kā shukr adā kartā huuñ maiñ sub.h-o-masā
laboñ pe rakh ke darūd-o-salām gardish meñ

ḳhudā bachā.e tumheñ aisī-vaisī nazroñ se
gale meñ Daal lo ta.avīz tum nazar ke liye