Tags-Khuda

nā-ḳhudā ban ke ḳhudā paar kar is kā beḌā
be-tarah phañs ga.ī hai hind kī mañjdhār meñ naav

ḳhudā-na-ḳhvāsta kashtī jo Dūbne lagtī
sivā ḳhudā ke bhalā kyā ye nāḳhudā karte

vasl se guzre ai ḳhudā haañ ye shugūn chāhiye
sub.h ko ham uThā kareñ rū-e-nigār dekh kar

māl-o-zar se bahra-e-vāfir na denā thā agar
ai ḳhudā tū ne diyā mujh ko dil-e-fayyāz kyuuñ

ḳhudā kare ki unheñ ye milāp raas aa.e
havāoñ se jo ta.alluq baḌhā rahe haiñ charāġh

jinheñ vasā.el pe hai bharosā ye baat un ko batā de koī
bachā le kashtī ko jo bhañvar se ḳhudā hai vo nāḳhudā kahāñ hai

nihāñ haiñ takmīl-e-ḳhud-shanāsī meñ jalva-hā-e-ḳhudā-shanāsī
jo apnī hastī se be-ḳhabar hai vo aap se āshnā kahāñ hai

jab aadmī mudd.ā-e-haq hai to kyā kaheñ mudda.ā kahāñ hai
ḳhudā hai ḳhud jis ke dil meñ pinhāñ vo DhūñDhtā hai ḳhudā kahāñ hai

mile vo aish-e-guzishta bhī ai ḳhudā mujh ko
bahisht meñ jo dobāra mujhe shabāb milā

dil meñ ik jazba-e-bedād-o-jafā hī hogā
vo ḳhudā-vand bhī hogā to ḳhudā hī hogā

matā-e-zauq-e-sajda se abhī taskīñ nahīñ hotī
ḳhudā jaane junūn-e-roz-afzūñ kī davā kyā hai

mirī āñkhoñ meñ ik mausam hamesha sabz rahtā hai
ḳhudā jaane haiñ aise kaun se ashjār gum us meñ

tirī nazar kī ye āvārgī tujhe ma.alūm
ḳhudā kare ki kabhī mujh pe āshkār na ho

maiñ kuchh nahīñ huuñ to phir kyuuñ mujhe banāyā gayā
ye pūchhne kī ijāzat nahīñ ḳhudā se mujhe

jo likhnā chāhā na likh paayā maiñ ḳhudā afsos
so rah gayā mirī tahrīr meñ ḳhalā afsos

hameñ to jis ne pukārā ḳhudā lagā ham ko
vo kaun log haiñ jin ko ḳhudā nahīñ miltā

kaho to tum ko ḳhudā maan leñ mohabbat kā
ki ham ko tum sā koī dūsrā nahīñ miltā

kuchh aisī thī kashish mujh meñ ḳhirāj-e-husn bhī paayā
huā mash.hūr maiñ ishq-o-mohabbat kā ḳhudā ho kar

ai ḳhudā ajab hai tirī razā koī bhed is kā na pā sakā
ki milā to mil gayā be-talab jise māñgte the milā nahīñ

ye jo hashr barpā hai har taraf to bas is kā hai yahī ik sabab
hai laboñ pe nām-e-ḳhudā magar kisī dil meñ ḳhauf-e-ḳhudā nahīñ