Tags-Khuda

buto ye shīsha-e-dil toḌ do ḳhudā ke liye
jo sañg-dil ho to kyā chāhiye jafā ke liye

ḳhudā ne kaam diye haiñ judā judā sab ko
sanam jafā ke liye haiñ to ham vafā ke liye

hadd-e-sitam na kar ki zamāna ḳharāb hai
zālim ḳhudā se Dar ki zamāna ḳharāb hai

qasam ḳhudā kī maiñ kuchh khā ke so rahūñgā sanam
jo saath apne nahīñ mujh ko tū sulāne kā

us ke hañsne meñ rone kā andāz hai ḳhaak uḌāne meñ fariyād kā raaz hai
us ko chheḌo na 'anvar' ḳhudā ke liye varna bīmār kā dam nikal jā.egā

merā dāman to jal hī chukā hai magar aañch tum par bhī aa.e gavārā nahīñ
mere aañsū na poñchho ḳhudā ke liye varna dāman tumhārā bhī jal jā.egā

mirī kashtī laakh bhañvar meñ hai na karūñgā maiñ tirī minnateñ
ye patā nahīñ tujhe nāḳhudā mire saath merā ḳhudā bhī hai

ġhamoñ ko bhī hañs kar vo jī legā 'kalkal'
ḳhudā ko jo bartar batātā rahegā

jamāl-e-shab mire ḳhvāboñ kī raushnī tak hai
ḳhudā-na-karda charāġhoñ kī lau baḌhā na mile

'hātim' ab kis kī mujh ko parvā hai
koī mirā juz ḳhudā nahīñ to na ho

nikal ke aap se bāhar dikhā.ī kuchh na diyā
dikhā.ī kuchh na diyā to ḳhudā dikhā.ī diyā

kushūd-e-kār kī ḳhātir ḳhudā badalte rahe
charāġh-e-nazr the har āstāñ pe chalte rahe

havā badal ga.ī us bevafā ke hone se
vagarna ḳhalq to ḳhush thī ḳhudā ke hone se

ham us se ruuTh ga.e duur ho ga.e 'bushrā'
magar ḳhudā kī qasam us se pyaar ab bhī hai

hai dam-shumārī din ko to aḳhtar-shumārī shab
is tarah to ḳhudā na kisī ke kaTā.e din

jī jāntā hai kyūñki ye kaTte haiñ roz o shab
dushman ko bhī ḳhudā na kabhī ye dikhā.e din

Tuk fahm irādat se barhaman kī samajh shaiḳh
kyā kam hai ḳhudā se tire hañgāma butāñ kā

na ab vo ātish-e-namrūd hai na sho.ala-e-tūr
tirī nigāh ko kyā ho gayā ḳhudā jaane

ik ḳhalā, ek lā-intihā aur maiñ
kitne tanhā haiñ merā ḳhudā aur maiñ

jo kuchh guzartā hai mere dil par sunā.ūñ kis ko vo haa.e dilbar
ḳhudā kare phir vo din mayassar kahūñ maiñ apnī hī sab zabāñ se