Tags-Khuda

mushfiq malāz o qibla kaaba ḳhudā payambar
jis ḳhat meñ shauq se maiñ kyā kyā use likhā hai

rū-e-suḳhan hai kīdhar ahl-e-jahāñ kā yā rab
sab muttafiq haiñ is par har ek kā ḳhudā hai

ḳhudā kī tarah mire dil meñ gar na tū bastā
to merā dil bhī ibādat kā ghar nahīñ hotā

sāqiyā mai jo nahīñ baaqī to talchhaT hī sahī
Daal de nām-e-ḳhudā thoḌī sī paimāne meñ

'hayāt' dukhtī huī rag ko kis ne chheḌ diyā
uThī vo Tiis ki yaad aa gayā ḳhudā mujh ko

hogā pur-nūr siyah-ḳhāna hamāre dil kā
is meñ tum ġhaus-e-ḳhudā ko zarā aa jaane do

us kā milnā hai apne khone par
fil-haqīqat ḳhudā ḳhudī meñ nahīñ

ḳhudā kī zaat se kuchh munharif rahe vo log
ki jin ko chashm milī chahsm-e-haq-nigar na milī

ḳhudā kī shaan hai 'sā.ib' sab ek haiñ lekin
kisī bashar se kahīñ sūrat-e-bashar na milī

ishq to ek hī se hotā hai
saarī duniyā ḳhudā nahīñ hotī

umīdeñ toḌ de mere dil-e-muztar ḳhudā-hāfiz
zabān-e-husn par ab tak nahīñ mālūm hotī hai

mire ḳhudā mere jism-o-jāñ ke ḳhudā mire haath jhaḌ na jaa.eñ
duā tah-e-sañg-e-lab gaḌī hai asar zarā sā asar meñ rakh de

jo banā hai ārif-e-bā-ḳhudā ye vahī 'zahīr' hai be-hayā
vo jo rind-e-ḳhāna-badosh thā tumheñ yaad ho ki na yaad ho

vahāñ bhī mujh ko ḳhudā sar-buland rakhtā hai
jahāñ saroñ ko jhukā.e zamāna hotā hai

kaanā ḳhudā ne kar diyā is meñ hai apnī kyā ḳhatā
gaalī bakeñge ḳhuub ham koī hameñ chiḌā.e kyoñ

ḳhudā kare ki khule ek din zamāne par
mirī kahānī meñ jo isti.āra ḳhvāb kā hai

shāmat aa ga.ī āḳhir kah gayā ḳhudā-lagtī
rāstī kā phal paatā banda-e-muqarrab kyā

unheñ kyā ḳhauf ho 'shāhid' ḳhudā kā
ḳhudā jo is zamīñ par ban ga.e haiñ

bayān kar diyā jazbāt maiñ ne bhī 'shīrīñ'
hunar ye apnā nahīñ hai ḳhudā kā ḳhaas karam