Tags-Khuda

jo kuchh guzartā hai mere dil par sunā.ūñ kis ko vo haa.e dilbar
ḳhudā kare phir vo din mayassar kahūñ maiñ apnī hī sab zabāñ se

yād-e-ḳhudā se aayā na īmāñ kisī tarah
kāfir bane na ham na musalmāñ kisī tarah

ḳhudā ke vāste dāman kā chaak siine do
kabhī kabhī to junūñ hoshiyār hotā hai

'nūh' ham ko nazar aayā na yahāñ but bhī koī
log kahte the ki ka.abe meñ ḳhudā miltā hai

har talabgār ko mehnat kā sila miltā hai
but haiñ kyā chiiz ki DhūñDhe se ḳhudā miltā hai

ḳhudā kā shukr savere hī aa gayā qāsid
maiñ bach gayā shab-e-furqat ke naaz uThāne se

ugal na sañg-e-malāmat ḳhudā se Dar nāseh
milegā kyā tujhe shīshoñ ke TuuT jaane se

ġham diye haiñ to masarrat ke guhar bhī denā
ai ḳhudā tū mujhe jiine kā hunar bhī denā

ḳhudā ke fazl se mujh ko sabhī kuchh mil gayā lekin
mujhe is bazm meñ un kī kamī taklīf detī hai

tabāh-o-ḳharāb ik jahāñ ko kiyā hai
ḳhudā kā ġhazab hai javānī tumhārī

ḳhudā kī qudrat vo naak apnī baḌe gharāne meñ ghis ga.e haiñ
jo aqrabā se akaḌ rahe the vo samdhiyāne meñ ghis ga.e haiñ

zehn-o-dil is liye sargarm-e-amal rahte the
rahnumā.ī mirī har vaqt ḳhudā kartā thā

ahl-e-junūñ ke haq meñ hai hukm-e-ḳhudā yahī
tablīġh-e-dard harf-o-sadā kū-ba-kū kareñ

tabhī to sachchā ḳhudā bhī ḳhamosh hai 'ammār'
ye āstīñ kā asā kā mo.āmla hai huzūr

maiñ us ko mānūñ na mānūñ mujhe mile na mile
ye merā aur ḳhudā kā mo.āmla hai huzūr

sanam-kadoñ meñ to asnām jalva-farmā the
ḳhudā ke ghar meñ bhī mujh ko kahīñ ḳhudā na milā

ḳhudā jaane huī hai baat kaisī
muḳhālif sab ke sab apne hue haiñ

churātā huuñ ab āñkheñ ā.inoñ se
ḳhudā kā sāmnā hone lagā thā

nādān mā-sivā se na kar iltijā na maañg
māñge ḳhudā se bhī to ḳhudā ke sivā na maañg

ḳhud ho ke kuchh ḳhudā se bhī mard-e-ḳhudā na maañg
rasm-e-duā ye hai ki duā le duā na maañg