Tags-Khuda

ai ḳhudā ajab hai tirā jahāñ mirā dil yahāñ pe lagā nahīñ
jahāñ koī ahl-e-vafā nahīñ kisī lab pe harf-e-duā nahīñ

kyā dardnāk manzar-e-kashtī thā ruud meñ
maiñ nā-ḳhudā ko dekh rahā thā ḳhudā mujhe

tū ḳhudā ke liye merā dil toḌ de
roz kā ye bahānā zarūrī nahīñ

tirī āñkheñ ḳhudā mahfūz rakkhe
tirī āñkhoñ meñ hairānī bahut hai

phañsne vaalā thā phañsā aa ke tirī zulfoñ meñ dil
ba-ḳhudā is meñ nahīñ jurm sar-e-mū apnā

hargiz mire huzūr kabhī aa.iye na aap
aur aa.iye agar to ḳhudā ban ke aa.iye

ḳhudā ke fazl se ta.alīm vo huī hai aam
ḳhirad to ḳhair junūñ se bhī haath dho baiThe

taras ga.ī haiñ nigāheñ ziyāda kyā kahiye
sanam sanam rahe behtar ḳhudā na ho baiThe

jahāñ mauj-e-havādis chāhe le jaa.e
ḳhudā huuñ maiñ na koī nāḳhudā huuñ

ḳhudā jaane mirī gaThrī meñ kyā hai
na jaane kyuuñ uThā.e phir rahā huuñ

ḳhudā vajūd meñ hai aadmī ke hone se
aur aadmī kā tasalsul ḳhudā se qaa.em hai

mujh ko ḳhvāhish hī DhūñDne kī na thī
mujh meñ khoyā rahā ḳhudā merā

koshisheñ to bahut maiñ kartā huuñ
kyā karūñ aur kyā ḳhudā huuñ maiñ

ḳhudā mahfūz rakkhe un kī zid se
jo kahte haiñ dikhā dete haiñ kar ke

muñh moḌ but-kada se haram ko chalā hai shaiḳh
'uzlat' magar hai ka.abe hī meñ yahāñ ḳhudā na thā

ka.aba o kāshī alāmat haiñ ḳhudā ke nuur ke
tum ġharīboñ ke gharoñ meñ raushnī paidā karo

jaisā bhī hai vo yaar hai apnā khulā-Dalā
kuchh is liye bhī ḳhauf-e-ḳhudā mat kiyā karo

diiñ kyā hai balki dījiye īmān bhī unheñ
zāhid ye but ḳhudā kī qasam aise shaḳhs haiñ

bal hai abrū pe nazar tez ḳhudā ḳhair kare
aaj kuchh hashr ke āsār nazar aate haiñ

yūñhī kisī kī koī bandagī nahīñ kartā
butoñ ke chehroñ pe tevar ḳhudā ke rakkhe the