Tags-Khuda

sham.a jalāne aa.e haiñ aaj vo merī qabr par
chalnā ḳhudā ke vāste bād-e-sabā alag alag

ehtiyātan use chhuā nahīñ hai
aadmī hai koī ḳhudā nahīñ hai

ḳhudā-hāfiz mire ai ham-nashīno
ki mujh ko to bulāvā aa gayā hai

ḳhudā havas se bachā.e magar ka.ī din se
tire badan pe bhī ham iḳhtiyār chāhte haiñ

apnī kashtī kā hai ḳhudā hāfiz
pīchhe tūfāñ hai sāmne girdāb

mere har ek sach pe unheñ jhuuT kā gumāñ
kartā hai bad-gumān ḳhudā ḳhair hī kare

husn-e-bātin husn-e-zāhir se baḌī shai hai na bhuul
rañg haiñ donoñ ḳhudā ke gore aur kaale na dekh

milī roz ham fāqa-mastoñ ko mai
ḳhudā jaane mahñgī ki sastī rahī

aap karte jo ehtirām-e-butāñ
but-kade ḳhud ḳhudā ḳhudā karte

vo ḳhudā hai to bhalā us se shikāyat kaisī?
muqtadir hai vo sitam mujh pe jo Dhānā chāhe

'āsif' ḳhudā ke vāste mat de butoñ ko dil
ye vo haiñ jin ke qaul kā kyā e'tibār hai

ḳhudā kā vāsta kyā duuñ use maiñ
jahāñ maiñ jis kā maz.hab kuchh nahīñ hai

maiḳhāne meñ kyuuñ yād-e-ḳhudā hotī hai aksar
masjid meñ to zikr-e-mai-o-mīnā nahīñ hotā

naved-e-sar-bulandī dī munajjim ne to maiñ samjhā
sagān-e-dahr ke aage ḳhudā hone kā vaqt aayā

ḳhudā jaane ye hai auj-e-yaqīñ yā pasti-e-himmat
ḳhudā se kah rahā huuñ nā-ḳhudā hone kā vaqt aayā

shabāb aayā kisī but par fidā hone kā vaqt aayā
mirī duniyā meñ bande ke ḳhudā hone kā vaqt aayā

maiñ apnī jaan siiñ hāzir huuñ lekin 'ābrū' to rakh
ḳhudā ke vāste iitā bhī rūkhā tū na rah ham siiñ

nazar paḌā ik but-e-parī-vash nirālī saj-dhaj na.ī adā kā
jo umr dekho to das baras kī pe qahr o aafat ġhazab ḳhudā kā

na sanam-kadoñ kī hai justujū na ḳhudā ke ghar kī talāsh hai
mire dil meñ bhar de jo bijliyāñ mujhe us nazar kī talāsh hai

zabāñ pe shikva-e-be-mehrī-e-ḳhudā kyuuñ hai?
duā to māñgiye 'ātish' kabhī duā kī tarah