Tags-Khuda

hai vahī ek mere sivā aur maiñ
donoñ tanhā haiñ merā ḳhudā aur maiñ

'zafar' aadmī us ko na jāniyegā vo ho kaisā hī sāhab-e-fahm-o-zakā
jise aish meñ yād-e-ḳhudā na rahī jise taish meñ ḳhauf-e-ḳhudā na rahā

daam phailā.e hue hirs-o-havā haiñ kitne
ek banda hai magar us ke ḳhudā haiñ kitne

suneñ dal ke muñh se maiñ jab aisī bāteñ
ḳhudā shāhid hai maiñ ne ro ro diyā hai

ḳhudā kī taraf jin ne dil ko lagāyā
huā faz us ke se vo ambiyā hai

ḳhudā huuñ sadā āshiqī par maiñ usī kī
vo jo qais sahrā meñ ek ho gayā hai

ai nāḳhudā ḳhudā pe mujhe chhoḌ kar to dekh
sāhil pe kaun jā ke lage Duub jaa.e kaun

maqām tak bhī ham apne pahuñch hī jā.eñge
ḳhudā to dost hai dushman hazār raah meñ hai

ḳhudā gavāh dil ik lamha bhī nahīñ ġhāfil
tumhārī yaad bhī baaqī hai dukh bhī baaqī hai

muttafiq is par sabhī haiñ kyā ḳhudā kyā nāḳhudā
ye safīna ab kahīñ bhī jaa.e sāhil ke sivā

'zafar' vahāñ ki jahāñ ho koī bhī had qaa.em
faqat bashar nahīñ hotā ḳhudā bhī hotā hai

ḳhudā ma.alūm kaisā sehr thā is but kī chitvan meñ
chale jaatī haiñ ab tak chashmakeñ shaiḳh-o-barahman meñ

nahīñ aarzū mirī aarzū ko sune ḳhudā
asar aarzū meñ balā kā ho vahī ishq hai

maiñ insāñ thā ḳhudā hone se pahle
anal-haq kī anā hone se pahle

ḳhudā ne rakh liyā naaz o niyāz kā parda
ki roz-e-hashr mirī un kī barmalā na huī

tū ne ghar yuuñ to bulandī pe banāyā hai 'figār'
tū magar niiñd meñ chaltā hai ḳhudā ḳhair kare

ik taraf vaqt ke muñh-zor bagūloñ kā hujūm
ik taraf zard sā pattā hai ḳhudā ḳhair kare

pyaas paanī ke tajassus meñ bhaTaktī hai jahāñ
duur tak ret kā dariyā hai ḳhudā ḳhair kare

sab ne rasmī hī hañsī lab pe sajā rakkhī hai
har koī dard meñ Duubā hai ḳhudā ḳhair kare

jāñ-nisāroñ ko natīje kā tasavvur hī kahāñ
ā.īna sañg pe martā hai ḳhudā ḳhair kare