Tags-Khuda

tū ne ghar yuuñ to bulandī pe banāyā hai 'figār'
tū magar niiñd meñ chaltā hai ḳhudā ḳhair kare

hotī hai roz bāda-kashoñ kī duā qubūl
ai mohtasib ye shān-e-karīmī ḳhudā kī hai

aisā banā diyā tujhe qudrat ḳhudā kī hai
kis husn kā hai husn adā kis adā kī hai

khā.īñ ḳhudā kī raah meñ lākhoñ hī Thokareñ
tā-lā-makāñ bulandī-o-pastī chalī ga.ī

achchhā kiyā sharāb ḳhudā ne harām kī
rindoñ ke saath bāda-parastī chalī ga.ī

mujhe mahshar meñ bhī ummīd kam hai daad paane kī
ḳhudā.ī jab butoñ kī hai to kyā hogā ḳhudā merā

ḳhudā jaane harīm-e-nāz hai kitnī bulandī par
ki guzrīñ muddateñ lekin hai naala nā-rasā merā

mohabbat ġhair-fānī hai maraz hai lā-davā merā
ḳhudā kī zaat baaqī hai mohabbat hai ḳhudā merā

ḳhudā ke shahr meñ phir koī sañgsār huā
jise bhī dekhiye patthar dikhā.ī detā hai

ḳhudā kā shukr hai girdāb se nikal aayā
maiñ us ke halqa-e-ahbāb se nikal aayā

mujhe ḳhudā se zarā ham-kalām hone do
tumhārā zikr bhī is guftugū meñ aa.egā

barsoñ uljhe arbāb-e-ḳhirad ye ek girah ab tak na khulī
sar aap hī jhuk ga.e sajde meñ ghabrā ke ḳhudā ko maan liyā

kyuuñ husn-e-garāñ-māya ye kyā tere jalve itne arzāñ
ek ek ḳhudā apnā apnā jis ne jise chāhā maan liyā

mujh se lākhoñ ḳhaak ke putle banā saktā hai tū
maiñ kahāñ se ek terā sā ḳhudā paidā karūñ

banda hai ḳhudā kā to yaqīñ kar ki butāñ kā
banda ye jahāñ be-zar-o-be-dām kā huuñ maiñ

ba-zom-e-ḳhud kahīñ ḳhud se varā na ho jā.ūñ
ḳhudā-na-ḳhvāsta maiñ bhī ḳhudā na ho jā.ūñ

un meñ shān-e-ḳhudā hai jalva-fagan
ham ko asnām se mohabbat hai

ma.āz-allāh ab ye rañg hai duniyā kī mahfil kā
ḳhudā kā naam lenā aur zalīl o ḳhvār ho jaanā

qātil kā haath aaj ḳhudā ke hai rū-ba-rū
dast-e-duā bhī ḳhuun kā sāġhar lagā mujhe

ḳhudā kī rahmateñ ai mutrib-e-rañgīñ-navā tujh par
ki har kāñTe meñ tū ne ruuh dauḌā dī gulistāñ kī