Tags-Khuda

karne haiñ tere jism pe ik baar dastaḳhat
taaki ḳhudā se kah sakūñ tū mere naam hai

kyuuñ merī shikastoñ ko sahārā nahīñ miltā
insān huuñ muhtāj ḳhudā kā huuñ ḳhudā do

but-e-kāfir jo tū mujh se ḳhafā ho
nahīñ kuchh ḳhauf merā bhī ḳhudā hai

nikle the donoñ bhes badal ke to kyā ajab
maiñ DhūñDtā ḳhudā ko phirā aur ḳhudā mujhe

dil ḳhudā jaane kis ke paas rahā
in dinoñ jī bahut udaas rahā

vo ḳhudā.ī kar rahe the jab ḳhudā hone se qabl
to ḳhudā jaane kareñge kyā ḳhudā hone ke ba.ad

ḳhudā se lau lagā.eñ yā ḳhudā.ī se rahe rishta
faqat apnī ḳhudī kā ehtirām achchhā nahīñ lagtā

kabhī ḳhvāhish-e-duniyā le Duubī kabhī ḳhauf-e-ḳhudā ne tañg kiyā
ab aa kar bhed khulā ham par na thī ye achchhī na thā vo achchhā

kabhī yād-e-ḳhudā kabhī ishq-e-butāñ yūñhī saarī umr gañvā baiThā
ab āḳhir-e-umr meñ aa ke khulā na thī ye sachchī na thā vo sachchā

bahut mazammat-e-mai-ḳhvār likh rahā hai shaiḳh
ḳhudā kare ki bane jadval-e-kitāb sharāb

ḳhudā ke ghar meñ vo barrā rahā hai ai rindo
jagāo shaiḳh ko chiḌko ba-rū-e-ḳhvāb sharāb

saañs luuñ to yuuñ lage koī gunāh kar diyā
ab to koī faisla sunā hī de ḳhudā mirā

mujh se vo sukūn māñgtā hai ye bhī din hai ek
jo tamām umr hī banā rahā ḳhudā mirā

ḳhudā ko āzmānā chāhtā huuñ
maiñ ye duniyā jalānā chāhtā huuñ

kisī ma.asūm bachche kī tarah maiñ
ḳhudā ko sab batānā chāhtā huuñ

javānī ko sazā-e-lazzat-e-ehsās de denā
maiñ is had par ḳhudā ko aadmī mahsūs kartā huuñ

bahut bechain huuñ niiñd aa rahī hai raat jaatī hai
ḳhudā ke vāste jald ab karo tadbīr sone kī

aa jā ḳhudā ke vāste aa jā na der kar
dil merā vā-guzār huā hai abhī abhī

ishq-e-bashar se ishq-e-ḳhudā mo'tabar huā
ye nukta āshkār huā hai abhī abhī

ālam-e-husn hai vo naqsh-e-ma.ānī 'sāqib'
jo mirī tab-e-ḳhudā-dād ne ījād kiyā