Tags-Khuda

yaktā-e-zamāna hone par sāhab ye ġhurūr ḳhudā.ī kā
sab kuchh ho magar ḳhākam-ba-dahan kyā koī ḳhudā ho jaatā hai

dil-e-barbād pe hai sāya-fagan yaad tirī
sāya-e-fazl-e-ḳhudā jaise gunahgār ke saath

umīd-vār janāb-e-ḳhudā se hai 'hātim'
ki hove kaam kā us ke shitāb se anjām

tum māñgte ho saarī ḳhudā.ī to maañg lo
apne liye to sirf ḳhudā māñgtā huuñ maiñ

islāh-e-ahl-e-hosh kā yaarā nahīñ hameñ
is qaum par ḳhudā ne utārā nahīñ hameñ

ḳhudā gavāh ki un meñ vahī halākat hai
ye teġh-o-tīr ye ḳhanjar usī se milte haiñ

shaiḳh aa jalva ḳhudā kā mai-kade meñ hai mire
kyuuñ ragaḌtā hai abas ka.abe ke tū dar par jabīñ

zarā bahr-e-ḳhudā insāf kar aur bhūlne vaale
taġhāful sheva-e-māshūq hotā hai magar itnā

vo sanam maiñ ne tarāshe ki ḳhudā chauñk uThe
maiñ vo aazar huuñ jise mashq-e-hunar le Duube

vahī sā.at-e-ġham-e-ārzū jo hamesha dil meñ basī rahī
hai ḳhudā kā shukr ki 'āfrīñ' vo hamāre sar se to Tal ga.ī

bharā hai shīsha-e-dil ko na.ī mohabbat se
ḳhudā kā ghar thā jahāñ vaañ sharāb-ḳhāna huā

'barqī' jo ḳhud-shanās hai vo hai ḳhudā-shanās
gum-gashtagī-e-hosh-o-ḳhirad be-ḳhudī nahīñ

mom kī tarah pighal jā.egā shab kā faulād
dast-e-dā.ūd kī taufīq ḳhudā se māñgo

ḳhudā kare ġham-e-gītī kā pech-o-tāb ai dost
kuchh aur bhī tirī zulfoñ ko tābdār kare

ḳhudā atā kare ohda baḌā ġharīb ko aur
badal sake na vo ḳhū naukaroñ meñ baiThne kī

is shahr kā har jhūTā ḳhudā dekh rahā hai
haqdār kī dastār kā kaTh-putlī tamāshā

kal shab qasam ḳhudā kī bahut Dar lagā hameñ
ik zalzala vajūd ke andar lagā hameñ

unheñ dekh kar dekhtī rah ga.iiñ
ḳhudā jaane āñkhoñ ko kyā ho gayā

de agar mujhe ijāzat jo mirā zamīr mujh ko
maiñ tujhe ḳhudā banā luuñ tirī bandagī se pahle

pahle vo kār-e-ishq meñ uljhā rahā bahut
phir ḳhud meñ vo ḳhudā kā nishāñ DhūñDhtā rahā