Tags-Khuda

kaun apnā hai ik ḳhudā vo bhī
rahne vaalā hai āsmānoñ kā

yak-bārgī to ab mujhe yā-rab tū phir basā
kartā hai ab ḳhudā se ye fariyād āgara

tum aur apne va.ade pe aa jaao shaam se
kyā baat ban paḌī hai ḳhudā-sāz dekhnā

paañv dāman se ulajhte haiñ ḳhudā ḳhair kare
haath rahte haiñ ka.ī din se garebāñ ke qarīb

na itnā zulm kar ai chāñdnī bahr-e-ḳhudā chhup jā
tujhe dekhe se yaad aatā hai mujh ko māhtāb apnā

achchhī nahīñ ye ḳhāmushī shikva karo gila karo
yuuñ bhī na kar sako to phir ghar meñ ḳhudā ḳhudā karo

zabāñ dī thī ḳhudā ne bolne ke vāste lekin
banāyā nāz-o-tamkīñ ne tumheñ tasvīr miTTī kī

banā kar aadmī kyuuñ āb-o-gil meñ ishq ko Daalā
nikālī hai ḳhudā ne ye na.ī ta.azīr miTTī kī

husn meñ aap ke hai shān-e-ḳhudā
ishq-bāzoñ ke sajda-gāh ho tum

tum ne ḳhudā ke ghar meñ bhī fitna-e-ām rakh diyā
mere imaam kī jagah apnā imaam rakh diyā

mire chaman kī ḳhizāñ mutma.in rahe ki yahāñ
ḳhudā ke fazl se andesha-e-bahār nahīñ

mire muñh se niklā ye barmalā tujhe shaad kāmrāñ rakhe ḳhudā
tū payām laayā hai yaar kā tirī umr ḳhizr se kam na ho

ham mutma.in haiñ us kī razā ke baġhair bhī
har kaam chal rahā hai ḳhudā ke baġhair bhī

iz.hār-e-mohabbat kī hasrat ko ḳhudā samjhe
ham ne ye kahānī bhī sau baar sunā Daalī

ho na jab tak 'matīn' kaif-e-ġham
aadmī ko ḳhudā nahīñ miltā

maiñ yahāñ se palaTnā chāhtā huuñ
ai ḳhudā terā mashvara kyā hai

abhī hāsil nahīñ zālim ko davām
abhī duniyā meñ ḳhudā baaqī hai

kyā ḳhabar kyā ḳhatā mirī thī ki jo
mujh se rūThā rahā ḳhudā merā

patthar ko tarāsh kar bhī dekho
ye fan bhī ḳhudā kī justujū hai

vo daur-e-hādsāt-e-jahāñ hai ki al-amāñ
apnā to bas ḳhudā hī nigahbāñ hai in dinoñ