Tags-Khuda

kahā us but se martā huuñ to 'momin'
kahā maiñ kyā karūñ marzī ḳhudā kī

tashkīk hai, na jañg hai mābain-e-aql-o-dil
bas ye yaqīn hai ki ḳhudā hai, ye ishq hai

zer-e-qabā jo husn hai, vo husn hai ḳhudā
band-e-qabā jo khol rahā hai, ye ishq hai

but bhī na bhūleñ yaad ḳhudā kī bhī kījiye
paḌhiye namāz kar ke vuzū āb-e-gañg se

nafas nafas pe ye ehsās-e-ġham ye majbūrī
ḳhudā-gavāh qayāmat hai zindagī kyā hai

bashar samajh ke kiyā thā nā yuuñ nazar-andāz
le maiñ bhī chhoḌ rahā huuñ tujhe ḳhudā kar ke

dekhiye laatī hai us shoḳh kī naḳhvat kyā rañg
us kī har baat pe ham nām-e-ḳhudā kahte haiñ

ḳhudā kātib kī saffākī se bhī mahfūz farmā.e
agar nuqta uḌā de nām-zad nāmard ho jaa.e

kuchh maqsad-e-hayāt na ḳhauf-e-ḳhudā use
jannat kī aarzū hai na mushtāq-e-hūr hai

ham us kā naqsh-e-pā bhūle hue haiñ
ḳhudā-vandā ye kyā bhūle hue haiñ

aaj tak ham ko to vo but na milā par na milā
kahte haiñ DhūñDne vaale ko ḳhudā miltā hai

ham se is ishq-e-majāzī kī haqīqat pūchho
ke ye but jab nahīñ milte to ḳhudā miltā hai

vaa.iz ko la.an-ta.an kī fursat hai kis tarah
puurī abhī ḳhudā kī taraf lau lagī nahīñ

bechain raat karvaTeñ letī thiiñ baar baar
lagtā hai mere saath ḳhudā jāgtā rahā

zamīñ ke log to kyā do diloñ kī chāhat meñ
ḳhudā bhī ho to use darmiyān laao mat

āh-e-be-asar niklī naala nā-rasā niklā
ik ḳhudā pe takiya thā vo bhī aap kā niklā

yahīñ tak is shikāyat ko na samjho
ḳhudā tak jā.egā jhagḌā hamārā

ik muddat meñ phirte phirte muñh se sunī darbāñ ke ye baat
shukr ḳhudā kā apne vo ghar meñ aaj to pyāre sote haiñ

parvāne kī tapish ne ḳhudā jaane kaan meñ
kyā kah diyā ki sham.a ke sar se dhuāñ uThā

butoñ kā zulm kisī ne sunā na mahshar meñ
ḳhudā se bhī mirā jhagḌā na infisāl huā