Tags-Khuda

maiñ apne aks ko 'āsim' ḳhudā samajh baiThā
ḳhatā huī thī ye mahv-e-jamāl hote hue

chalo farār-e-ḳhudī kā koī sila to milā
hamīñ mile nahīñ us ko hameñ ḳhudā to milā

ai ḳhudā kyā yuuñ hī aatī hai kisī dost kī yaad
aa gayā muñh ko kaleja dil-e-muztar ulTā

baḌā maza ho jo mahshar meñ ham kareñ shikva
vo minnatoñ se kaheñ chup raho ḳhudā ke liye

dekhā jo us ne pyaar se aġhyār kī taraf
'shā.ir' qasam ḳhudā kī mirī jaan jal ga.ī

fāsle raaz darmiyāñ haiñ magar
aadmī phir bhī hai ḳhudā ke qarīb

ye ḳhudā hī jaane vo kaun thā jo shahīd-e-nāz-o-adā huā
ki uḌī hai ḳhāk-e-rah-e-sanam to ḳhizāñ meñ rañg-e-bahār hai

tauba tauba ye balā-ḳhez javānī tauba
dekh kar us but-e-kāfir ko ḳhudā yaad aayā

kartī hai nayā roz mire dāġh-e-kuhan ko
ġhurbat meñ ḳhudā yaad dilā.e na vatan ko

ahl-e-daulat bhī kuchh log kyā ho ga.e
māl-o-zar un ke jaise ḳhudā ho ga.e

haiñ sar-nigūñ jo tāna-e-ḳhalq-e-ḳhudā se ham
kyā ho ga.e kisī kī mohabbat meñ kyā se ham

ka.aba bhī ham ga.e na gayā par butoñ kā ishq
is dard kī ḳhudā ke bhī ghar meñ davā nahīñ

ab ḳhudā jaane kahāñ le jā ke bikhrā.e havā-e-vaqt mujh ko
aao haath apnā baḌhā kar tum bhī merī ḳhaak chuTkī-bhar nikālo

likhā thā naam maiñ ne jo ḳhudā kā
usī kā bas sahārā mil rahā thā

us kī zulf-e-siyah hai ek balā
is balā se ḳhudā hī deve panāh

ḳhudā kā shukr ki maiñ ḳhud-shanās huuñ varna
samajhtā kaun pur-asrār ādateñ merī

ḳhudā nasīb kare jis ko sohbateñ merī
na bhuul paa.e kabhī vo hikāyateñ merī

gunāhgār haiñ itne hī un butoñ ke ham
ki pāñch vaqt ḳhudā ko pukār lete haiñ

ik anokhī kaifiyat ne chhū liyā
haath meñ jaise ḳhudā kā haath thā

lag ga.ī kis kī nazar daur-e-taraqqī pe ḳhudā
aaj apne hī nazar aate haiñ begāne se