Tags-Khuda

'mīr' bandoñ se kaam kab niklā
māñgnā hai jo kuchh ḳhudā se maañg

ye roz-marra ke kuchh vāqi.āt-e-shādī-o-ġham
mire ḳhudā yahī insāñ kī zindagānī hai

maiñ us pe jaan chhiḌaktā huuñ bā-ḳhudā phir bhī
kahīñ hai kuchh mare bhītar jo intiqāmī hai

zid aur ye zid ai dil achchhā to ḳhudā-hāfiz
qurbān hī us but par hotā hai to jā ho jā

ḳhudā mahfūz rakkhe nāla-hā-e-shām-e-furqat se
zamīñ bhī kāñptī hai āsmāñ tharrā.e jaate haiñ

haiñ tark-e-ulfat meñ ham bhī raazī ye kah do be-khaTke us sanam se
butoñ kā is hind kī zamīñ par ḳhudā kī rahmat se kaal kyā hai

shukr kartā huuñ ḳhudā ne mujhe mahsūd kiyā
ab maiñ samjhā ki mire paas hunar kyā kuchh hai

jis din mirī jabīñ kisī dahlīz par jhuke
us din ḳhudā shigāf mire sar meñ Daal de

rahnumāoñ ko nahīñ ḳhud bhī patā raste kā
rāh-rau paikar-e-hairat hai ḳhudā ḳhair kare

aa chalā us but-e-ayyār kī bātoñ kā yaqīñ
sādgī apnī qayāmat hai ḳhudā ḳhair kare

jā.e-māñdan hameñ hāsil hai na pā.e-raftan
kuchh musībat sī musībat hai ḳhudā ḳhair kare

ik hujūm-e-ġham-o-kulfat hai ḳhudā ḳhair kare
jaan par nit-na.ī aafat hai ḳhudā ḳhair kare

sab jhuuT hai ki tum ko hamārā ho ġham miyāñ
baabā kise ḳhudā ke sivā ġham faqīr kā

ḳhudā kā shukr ki mere hī jurm kaafī the
faqīh-e-shahr mire ḳhāndān tak na gayā

khulī jab aañkh to dekhā ki thā bāzār kā halqa
ḳhudā ma.alūm kab TuuTā mire pindār kā halqa

shab-e-firāq raqīb aa ke de mujhe taskīñ
qasam ḳhudā kī ye sāzish bhī aap kī hogī

yahī nahīñ ki mire gird khīñchnī haiñ hadeñ
mire ḳhudā ne ḳhudā ho ke zinda rahnā hai

'jāmī' pe kyā banegī ḳhudā jaane hashr meñ
jannat kī aarzū hai gunāhoñ se pyaar bhī

husn sab ko ḳhudā nahīñ detā
har kisī kī nazar nahīñ hotī

mujhe na chheḌ qayāmat hai merī aahoñ meñ
ḳhudā rakhe tirī mahfil sajī-sajā.ī hai