Tags-Khuda

payambaroñ se zamīneñ vafā nahīñ kartīñ
ham aise kaun ḳhudā the ki apne ghar rahte

bikhar na jaa.e mirī zindagī kā shīrāza
mire ḳhudā mirī himmat ko tū javāñ rakhnā

fāsla itnā na rakhnā thā ḳhudā
is zamīñ ko āsmāñ dete hue

janāb-e-shaiḳh ke lab par ḳhudā kā naam aatā hai
subūhī-kash magar vaqt-e-azāñ kuchh aur kahtā hai

jo ham ye tifloñ ke sañg-e-jafā ke maare haiñ
butoñ kā shikva nahīñ ham ḳhudā ke maare haiñ

maiñ dar-guzrā sāhib-salāmat se bhī
ḳhudā ke liye itnā barham na ho

kah dūñgā jo kī pursish-e-āmāl ḳhudā ne
fursat hī na dī kashmakash-e-bīm-o-rajā ne

ḳhudā kare ki ye paudā zamīñ kā ho jaa.e
ki aarzū mire āñgan ko ek phuul kī hai

banā diyā thā jahāñ ko ḳhudā ne kun kah kar
karoḌoñ saal lage haiñ ise basāne meñ

tire karam se hamesha hī ḳhush rahā 'anvar'
mire ḳhudā na kabhī lab pe āh-o-zārī ho

pīchhe mire paḌā hai tū kyuuñ ghar kī raah le
rusvā kare gā kyā mujhe bahr-e-ḳhudā sarak

hameñ chaar samt kī dauḌ meñ vahī gard-e-bād-e-sadā milā
bane apnī zaat meñ guuñj ham na ḳhudī milī na ḳhudā milā

vaqt kī Dor ḳhudā jaane kahāñ se TuuTe
kis ghaḌī sar pe ye laTkī huī talvār gire

baat kah dī thī ik ḳhudā-lagtī
merī samt aa.e kis qadar patthar

be-ḳhudī gar ho ḳhud to aa ke mile
ai ḳhudā be-ḳhudī ajab shai hai

kuchh to tūfāñ kī zad meñ ham aa.e
kuchh navāzish bhī nā-ḳhudā ne kī

ḳhudā ke vāste daad us junūn-e-shauq kī denā
ki us ke dar pe pahuñchte haiñ nāma-bar se ham aage

saarī duniyā ko ḳhudā ek hī sūraj de de
kaash bujh jaa.eñ zamāne se ye firqoñ ke charāġh

maiñ ḳhudā kī qabr huuñ
ḳhudā mere andar dafn hai

dekhiye laatī hai us shoḳh kī naḳhvat kyā rañg
us kī har baat pe ham nām-e-ḳhudā kahte haiñ