Tags-Khuda

ḳhudā hai shāhid ki zindagī meñ vo sajda-hā-e-ġham-e-mohabbat
qazā hue the jo gāhe-gāhe ba-shart-e-fursat adā kiye haiñ

ab maiñ huuñ mirī jāgtī rāteñ haiñ ḳhudā hai
yā TūTte pattoñ ke bikharne kī sadā hai

jo log kahte rahe haiñ ḳhudā mohabbat hai
ḳhud un ke hāthoñ hī ma.asūmiyat huī maslūb

vo musībat jise duniyā ġham-e-dil kahtī hai
maiñ na rokūñ to ḳhudā jaane kahāñ tak pahuñche

husn-e-ma.asūm agar rāz-e-nihāñ tak pahuñche
ġham kā me.aar ḳhudā jaane kahāñ tak pahuñche

tum rah-e-ishq meñ lillāh mirā saath na do
silsila ġham kā ḳhudā jaane kahāñ tak pahuñche

lazzat-e-dīd ḳhudā jaane kahāñ le jaa.e
aañkh hotī hai to hotā nahīñ qaabū dil par

ta.alluq ahl-e-jahāñ se ho gar to rakhiye bīm-o-rajā barābar
sivā ḳhudā ke kisī ke upar kabhī bharosa na kījiyegā

jo aap aa.eñ pa.e ayādat yaqīñ hai ho jaa.e mujh ko sehat
magar barā-e-ḳhudā ye zahmat kabhī gavāra na kījiyegā

dil-e-hazīñ kī tamannā nigāh ke matlūb
ḳhudā rakhe vo sabhī kuchh haiñ chāragar ke sivā

vo ḳhudā kī khoj meñ ḳhud āḳhirī had tak gayā
ḳhud ko paane kī magar koshish na kī anthak koī

samajh rahe the jise ham ki bevafā hogā
kise ḳhabar thī ki vo aadmī ḳhudā hogā

kisī ko kyā ḳhabar ai sub.h vaqt-e-shām kyā hogā
ḳhudā jaane tire āġhāz kā anjām kyā hogā

kyā balā shahar pe TuuTī hai ḳhudā ḳhair kare
yuuñ sar-e-shām koī dasht bhī vīrān na ho

kis qadar shoḳh mirī fitrat-e-rindāna hai
lab pe hai naam ḳhudā haath meñ paimāna hai

apnī zabāñ ko aaj vo tāsīr hai nasīb
jis ko ḳhudā-e-husn kahā vo ḳhudā huā

rahegī pyāsī ye dhartī mire ḳhudā kab tak
ruteñ guzar ga.iiñ bādal idhar nahīñ aayā

pūchhā jab mansūr se tum ne anal-haq kyuuñ kahā
ye kahā us ne ki vo shān-e-ḳhudā thī maiñ na thā

''zamāna ḳhudā hai use tum burā mat kaho''
magar tum nahīñ dekhte zamāna faqat resmān-e-ḳhayāl

ḳhudā kare to kisī raaz kā amiiñ na bane
gumāñ gumāñ hī rahe aur kabhī yaqīñ na bane