Tags-Khuda

nayā shu.ūr na.e isti.āre laatā hai
azal se log ḳhudā ko ḳhudā nahīñ kahte

shab-e-furqat meñ jab najm-e-sahar bhī Duub jaate haiñ
utartā hai mire dil meñ ḳhudā āhista āhista

munkirān-e-ḳhudā-e-baḳhshinda
us se to aur ik ḳhudā māñgo

kyoñ mirī qismat meñ us ne dard-o-ġham kuchh kam likhe
pūchh lūñgā maiñ ḳhudā se gar kabhī mujh ko mile

jab kabhī bhī is jahāñ se ruḳhsatī mujh ko mile
qabl is se ai ḳhudā kuchh zindagī mujh ko mile

dikhā ke jalva-e-bātil kī ik jhalak ai husn
ḳhudā ke banda ko nāhaq gunāhgār kiyā

na māñgiye jo ḳhudā se to māñgiye kis se
jo de rahā hai usī se savāl hotā hai

ḳhudā-vandā tire zauq-e-atā ko kyā kahe koī
milī hai ham se ḳhufta-qismatoñ ko dil kī bedārī

vo aalam hai ki har mauj-e-nafas hai ruuh par bhārī
ḳhudā jaane ye jiinā hai ki jiine kī adākārī

bus ḳhudā kī tarah
sab kī sunte raho

yahīñ jannat yahīñ goyā jahannam
tū hī ab soch ai bande ḳhudā ke

tālib ḳhudā se adl ke ḳhvāhāñ karam ke haiñ
mazlūm ham butoñ ke jafā-o-sitam ke haiñ

ḳhudā tujhe āfiyat kī ābādiyoñ meñ nauras safīr rakkhe
udhar ke dīvār-o-dar salāmat mirī taraf se salām kahnā

jāniye us se nibhegī kis tarah
vo ḳhudā hai maiñ to banda bhī nahīñ

bandagī ham ne chhoḌ dī hai 'farāz'
kyā kareñ log jab ḳhudā ho jaa.eñ

unheñ shu.ūr-e-mohabbat nahīñ ḳhudā kī qasam
jo log haiñ tirī mahfil meñ sarfarāz bahut

likh bayāz-e-marg meñ har jā anal-haq
aur kitāb-e-zīst meñ bāb-e-ḳhudā rakh

ḳhudā hī hai mirī kashtī kā hāfiz
ḳhudā ke vāste tū nāḳhudā jā

ki sciencī taur par bhī donoñ kā koī imkāñ nahīñ so kah duuñ
tumhārā milnā ḳhudā ke milne se kam nahīñ hai to kyā ġhalat hai

hameñ baḌoñ ne yahī kahā thā ki lā hī sach hai so ghar kī chhat par
kisī jamā.at kisī ḳhudā kā alam nahīñ hai to kyā ġhalat hai