Tags-Khuda

shahr ujḌe to kyā hai kushāda zamīn-e-ḳhudā
ik nayā ghar banā.eñge ham sabr kar sabr kar

kyā fusūñ tū ne ḳhudā jaane ye ham par maarā
tujh se phirtā nahīñ dil ham ne bahut sar maarā

ḳhudā hī rakkhe mire kārvāñ kī ḳhair ab to
ki rāhbar meñ adā rāhzan sī paatā huuñ

ḳhudā kare ki mire dost ḳhairiyat se hoñ
ajiib tarah kī dil meñ chubhan sī paatā huuñ

'nāsir' āshob-e-zamāna se ġhāfil na raho
kuchh hotā hai jab ḳhalq-e-ḳhudā kuchh kahtī hai

sab se chhuḌā kar laa.e uḌā kar kyā na rakheñge dil meñ chhupā kar
rahne basne chalne phirne tum ko ḳhudā kā deñge ghar ham

tum ko nazākat aur ḳhudā de ham ko lazzat aur ḳhudā de
pā.eñche tum chuTkī se uThā lo thāme hue chalte haiñ kamar ham

na diyā rahm Tuk butoñ ke ta.iiñ
kyā kiyā haa.e ye ḳhudā sāhab

ḳhudā vo vaqt na laa.e ki āzmā.ish ho
ta.alluqāt tumhīñ se haiñ ustuvār bahut

butāñ siiñ mujh kuuñ tū kartā hai man.a ai zāhid
rahā huuñ sun ki ye bhī ḳhudā kī bāteñ haiñ

ye ḳhudā jaane kisī ko hai ḳhabar yā ki nahīñ
ham bhī ik āshiq-e-ġham-ḳhvār haiñ kin ke un ke

'momin' ḳhudā ke vāste aisā makāñ na chhoḌ
dozaḳh meñ Daal ḳhuld ko kū-e-butāñ na chhoḌ

ḳhudā jaane dikhā.egī ye kyā rañg
duā.eñ jam.a haiñ arsh-e-barīñ par

kufr to farz hai aise māhaul meñ
ho jahāñ aadmī kā ḳhudā aadmī

har-dam ye duā māñgte rahte haiñ ḳhudā se
allāh bachā.e shab-e-furqat kī balā se

begānagī-e-ḳhalq se be-dil na ho 'ġhālib'
koī nahīñ terā to mirī jaan ḳhudā hai

suntī nahīñ thī ḳhalq-e-ḳhudā chīḳh chīḳh kar
ab āsmān sar pe uThānā paḌā mujhe

mirā akelā ḳhudā yaad aa rahā hai mujhe
ye sochtā huā girjā bulā rahā hai mujhe

devtāoñ kā ḳhudā se hogā kaam
aadmī ko aadmī darkār hai

mahak rahī hai zamīñ chāñdnī ke phūloñ se
ḳhudā kisī kī mohabbat pe muskurāyā hai