Tags-Khuda

ai dosto yahī hai qayāmat kī roz-e-hashr
ham bhī jagā.e jā.eñge ḳhalq-e-ḳhudā ke saath

ġham-e-furqat kā kyā shikva qayāmat aane vaalī hai
ḳhudā ke sāmne āḳhir to ik din sāmnā hogā

Tuk vāste ḳhudā ke mirā ijz jā kaho
bekas kaho ġharīb kaho ḳhāk-e-pā kaho

lahū meñ nahā ke vo hī chalā likhā thā jabīñ pe jis kī ḳhudā
the aur bhī da.ave-dār yahāñ magar vo imaam ho na sake

ek arz-e-mudda.ā hone se pahle
soch lenā thā ḳhudā hone se pahle

tum bhī do ek bosa bahr-e-ḳhudā
ki hai gul-gīr bosa-chīn-e-sham.a

parastish kī yaañ tak ki ai but tujhe
nazar meñ sabhoñ kī ḳhudā kar chale

shash-jihat tujh satī ma.amūr hai allāh allāh
jhamke hai chāroñ taraf nām-e-ḳhudā nuur tirā

ḳhudā ke naam pe duniyā ko lūTne vaale
ḳhudī kā dil meñ zarā ehtimām paidā kar

vo aa.e ghar meñ hamāre ḳhudā kī qudrat hai
kabhī ham un ko kabhī apne ghar ko dekhte haiñ

aarzū mere dil kī bar aa.e
sab kā puurā kare ḳhudā matlab

butoñ ko tākte guzrī hai sharm aa.egī
'jalīl' le na chalo sāmne ḳhudā ke mujhe

maiñ us but kā vasl ai ḳhudā chāhtā huuñ
maraz ishq kā hai davā chāhtā huuñ

hue chāra-jū kab marīz-e-mohabbat
ḳhudā maut de jo shifā chāhtā huuñ

lagī be-tarah hai ḳhudā hī bachā.e
sulagtā hai dil meñ jalā chāhtā huuñ

ḳhudā ma.alūm ye kaisā zamāna aatā jaatā hai
ki har har saañs ab to imtihānī hotī jaatī hai

ḳhudā kā shukr dil rāh-e-vafā meñ miTtā jaatā hai
jo faanī chiiz hai vo jāvedānī hotī jaatī hai

ḳhudā ne ek hī miTTī se gūñdhā sab ko ik jaisā
magar ham meñ koī adnā koī a.alā nikal aayā

haram kī manzileñ hoñ yā sanam-ḳhāne kī rāheñ hoñ
ḳhudā miltā nahīñ jab tak maqām-e-dil nahīñ miltā

minnat-e-nā-ḳhudā nahīñ manzūr
chāhe us ko ḳhudā kahe koī