Tags-Khuda

ye log vafā ke haamī the nā-mūs-o-hayā ke haamī the
bas ek rasūl ke qaa.il bas ek ḳhudā ke haamī the

ḳhudā ke sajde butoñ ke aage phir aise sajde ki sar na uTThe
ajab tarah kī hamārī niyyat na.ī tarah kī namāz meñ hai

mohabbat kī tarah ābād rakkhegā ḳhudā us ko
miTā saktī nahīñ duniyā-e-hādis kī havā us ko

is qadar zulm ibn-e-ādam par
jaise us kā koī ḳhudā hī nahīñ

ḳhudā ke vāste is ko na Toko
yahī ik shahr meñ qātil rahā hai

mujhe tum itnī bulandiyoñ par na laao ki maiñ ḳhudā nahīñ huuñ
mirī haqīqat ke hāshiye meñ mire fasāne kā baab likhnā

shab-e-vasl thī chāndnī kā samāñ thā
baġhal meñ sanam thā ḳhudā mehrbāñ thā

itnā be-āsrā nahīñ huuñ maiñ
aadmī huuñ ḳhudā nahīñ huuñ maiñ

tishnigān-e-shauq haiñ gum-karda-rāh
tū bhī chal bahr-e-ḳhudā do-chār gaam

ḳhudā mahfūz rakkhe fasl-e-dil ko
kahīñ sūkhā kahīñ paanī bahut hai

pochhiye mat kyā huā kaise huā
but koī merā ḳhudā kaise huā

dī qasam vasl meñ us but ko ḳhudā kī to kahā
tujh ko aatā hai ḳhudā yaad hamāre hote

utar to sakte ho yaar lekin ma.aal par bhī nigāh kar lo
ḳhudā-nā-karda sukūn-e-sāhil na raas aayā to kyā karoge

ḳhudā-garī kā ye māhir kuchh aur hī shai hai
tum aadmī jise kahte ho aadmī to nahīñ

terī āñkhoñ meñ ham ne kyā dekhā
kabhī qātil kabhī ḳhudā dekhā

dil ḳhush huā hai masjid-e-vīrāñ ko dekh kar
merī tarah ḳhudā kā bhī ḳhāna ḳharāb hai

maiñ jitnā DhūñDhtā huuñ us ko utnā hī nahīñ paatā
kidhar hai kis taraf hai aur kahāñ hai dil ḳhudā jaane

ḳhudā ke vāste ab is se haath uThā ki mire
jigar meñ nam nahīñ ai chashm-e-ashk-bār rahā

vo dil hī kyā tire milne kī jo duā na kare
maiñ tujh ko bhuul ke zinda rahūñ ḳhudā na kare

ThiThur rahe haiñ kyuuñ bhalā ḳhudā ke hī to ham bhī haiñ
chalo uThā ke oḌh leñ vo chādareñ mazār kī