Tags-Khuda

ai mard-e-ḳhudā ho tū parastār butāñ kā
maz.hab meñ mire kufr hai inkār butāñ kā

maiñ sotā rahtā huuñ aur jaane kab ḳhudā merā
añdherī raat ko sūraj meñ Dhaal detā hai

vo jis kī raah meñ gumrāh ho gayā huuñ maiñ
vahī ḳhudā mirā samt-e-safar sambhālegā

vo ḳhudā ke nek bande haiñ ki jin kī jeb meñ paisa nahīñ hai
muflisī ke board ghar ghar muft bāñTe jā rahe haiñ

ḳhudā pe jab se burā vaqt aa gayā 'qaisar'
hubal ke lab pe hai naġhma manāt raqs meñ hai

yuuñ huā ki sab aqā.ed radd kar baiThā huuñ maiñ
dekhnā hai ab kahāñ shauq-e-ḳhudā le jā.egā

sāmne hai jo use log burā kahte haiñ
jis ko dekhā hī nahīñ us ko ḳhudā kahte haiñ

mai-ḳhāne meñ kyuuñ yād-e-ḳhudā hotī hai aksar
masjid meñ to zikr-e-mai-o-mīnā nahīñ hotā

ḳhudā se nahīñ kaam ab ham ko yaaro
ki ik but ko apnā ḳhudā kar chuke ham

ḳhudā ke vāste gul ko na mere haath se lo
mujhe bū aatī hai is meñ kisī badan kī sī

husn-e-ārāsta qudrat kā atiyya hai magar
kyā mirā ishq-e-jigar-soz ḳhudā-dād nahīñ

kahtā huuñ ḳhudā-lagtī aqīde ke ḳhilāf
hai terā ḳhatā-vār sazāvār-e-muāf

ḳhudā ko kaam to sauñpe haiñ maiñ ne sab lekin
rahe hai ḳhauf mujhe vaañ kī be-niyāzī kā

raat sī niiñd hai mahtāb utārā jaa.e
ai ḳhudā mujh meñ zar-e-ḳhvāb utārā jaa.e

fariyād tak ḳhudā se na kī ai sanam tirī
maiñ be-zabāñ tire yahāñ ai be-dahan luTā

kāfir thā maiñ ḳhudā kā na munkir duā kā thā
lekin yahāñ savāl shikast-e-anā kā thā

'akbar' jahāñ meñ kār-kushā.ī butoñ kī thī
achchhā rahā jo mānñe vaalā ḳhudā kā thā

bahut aatā hai yaad ai sabr-e-miskīñ
ḳhudā ḳhush rakkhe tujh ko tū jahāñ hai

ḳhudā pinhāñ hai aalam āshkārā
nihāñ hai ganj vīrāna ayaañ hai

de ḳhudā zar to koī mai-kada ābād kareñ
achchhe kāmoñ meñ jo ho sarf vo maal achchhā hai