Tags-Khuda

qayāmat to hamārī thī ham aapas meñ nibat lete
koī pūchhe ḳhudā kyuuñ aa gayā maidān-e-mahshar meñ

khule gesū to dīdār-e-ḳhudā bhī ho gayā mushkil
qayāmat kā añdherā chhā gayā maidān-e-mahshar meñ

ye kaisī jañg hai jis meñ bamoñ kī yūrish se
samā.ateñ bhī ḳhudā kī panāh chāhtī haiñ

ḳhudā ke ba.ad to be-intihā añdherā hai
tirī talab meñ kahāñ tak na merā dhyān gayā

ai ḳhudā gila sun le apnī be-niyāzī kā
aaj haal kahtā hai ek be-zabāñ apnā

kaun lā.egā kisī pyaas ke sajde kā javāb
ai ḳhudā dasht na ab karb-o-balā sā denā

ham ḳhudā bhī maan leñge aap ko
aap pahle ho to jaa.eñ aadmī

tire baġhair koī aur ishq ho kaise
ki mushrikoñ ke liye bhī ḳhudā zarūrī hai

hijrat-o-hijr se bachā.e ḳhudā
mujh ko lāhaq haiñ aaj ġham donoñ

hamāre vāste har aarzū kāñToñ kī maalā hai
hameñ to zindagī de kar ḳhudā ne maar Daalā hai

ḳhudā bhī jab na ho mālūm tab jaano miTī hastī
fanā kā kyā mazā jab tak ḳhudā mālūm hotā hai

unheñ yuuñ na dar se haTā.iye unheñ kuchh to de ke hī Tāliye
ki vahī ġharīb-e-dayār haiñ vo ġharīb jin kā ḳhudā nahīñ

yaar nām-e-ḳhudā hai kashtī meñ
nāḳhudā aaj paar beḌā hai

dete haiñ dil ke evaz vo dard bahr-e-imtihāñ
lete haiñ nām-e-ḳhudā apnī tamāniyyat kī aaḌ

shaiḳh sāhab ḳhudā se Darte hoñ
maiñ to añgrezoñ hī se Dartā huuñ

ehsān nāḳhudā kā uThānā thā nāgavār
us paar ham ḳhudā ke sahāre chale ga.e

na paimāne khanakte haiñ na daur-e-jām chaltā hai
na.ī duniyā ke rindoñ meñ ḳhudā kā naam chaltā hai

ik fasīl-e-havā na rañg na ruup
ik ḳhayāl-e-ḳhudā mujhe bahkā.e

daaġh ban kar to rahā dāman-e-qātil pe magar
bū-e-ḳhūñ bahr-e-ḳhudā bū-e-vafā ho jaanā