Tags-Khuda

vo ḳhudā to nahīñ lekin hai ḳhudā kā banda
jis kī āvāz se tharrā.ī hai saarī duniyā

rañg-e-ḳhullat se dil-e-shaidā muraqqa.a ban gayā
ye ḳhudā kā ghar bhī is sūrat se but-ḳhāna huā

justujū us kī ḳhudā jaane hai kis manzil tak
ḳhatm hotā nahīñ 'aḳhtar' kā safar se rishta

hai ab to qat-e-ta.alluq kī ek hī sūrat
ḳhudā kare tū hameñ dekh kar na pahchāne

kyā mujhe paidā kiyā hai ai ḳhudā
in butoñ kī bandagī ke vāste

husn aur ishq donoñ meñ tafrīq hai par inhīñ donoñ pe merā īmān hai
gar ḳhudā ruuTh jaa.e to sajde karūñ aur sanam ruuTh jaa.e to maiñ kyā karūñ

maiñ ne māñgī thī ye masjidoñ meñ duā maiñ jise chāhtā huuñ vo mujh ko mile
jo mirā farz thā maiñ ne puurā kiyā ab ḳhudā hī na chāhe to maiñ kyā karūñ

tirī jafā kā ḳhudā silsila darāz kare
ki us se apnā ta.alluq bhī gaah gaah kā thā

ishq ḳhud apnī jagah maz.har-e-anvār-e-ḳhudā
aql is soch meñ gum kis ko ḳhudā kahte haiñ

ḳhud apne hone ke ḳhauf meñ ab jo mubtalā haiñ
ḳhudā ke hone se bhī vo pahle Dare nahīñ the

ḳhudā aur nāḳhudā donoñ ḳhajil haiñ haal par mere
maiñ vo tinkā huuñ jo āġhosh-e-tuġhyānī meñ rahtā hai

ajab pāgal hai dil kār-e-jahāñ baanī meñ rahtā hai
ḳhudā jab dekhtā hai ḳhud bhī hairānī meñ rahtā hai

rū-e-suḳhan hai kīdhar ahl-e-jahāñ kā yā rab
sab muttafiq haiñ is par har ek kā ḳhudā hai

dekhī na ḳhudā-tarsī ik gabr o musalmāñ se
har ik se talab kar kar maiñ daad bahut royā

ḳhudā par hī sadā īmān rakhnā
bahar-sūrat usī kā dhyān rakhnā

duniyā-e-dūñ kī de na mohabbat ḳhudā 'zafar'
insāñ ko pheñk de hai ye īmān o diiñ se duur

sitāroñ kī gardish diloñ kā bichhaḌnā
ye kaise ḳhudā kī hai kaisī ḳhudā.ī

gire qatroñ meñ patthar par sadā aisā bhī hotā hai
bhalā ho kar bhalā nām-e-ḳhudā aisā bhī hotā hai

sune ko dekhe pa ham kis tarah se deñ tarjīh
ḳhudā to ham ne sunā hai tumheñ butāñ dekhā

ham ḳhud bhī hue nādim jab harf-e-duā niklā
samjhe the jise patthar vo shaḳhs ḳhudā niklā