Tags-Khuda

us kā bhī ek vaqt hai aane do maut ko
'muztar' ḳhudā kī yaad abhī kyuuñ kare koī

dekh kar husn butoñ kā jo ḳhudā se phir jaa.e
dil-e-gumrāh ko phir raah pe lā hī na sakūñ

ḳhudā kare ki fareb-e-vafā rahe qaa.em
ki zindagī kā koī aur ab sahārā nahīñ

chāra-e-sarkashī-e-dil kareñ allāh allāh
vo ḳhudā banda-navāz aap to kyā ham bhī nahīñ

'aḳhtar' gunāh karne se phir roktā thā kaun
maiñ kaise maan luuñ ki vahāñ par ḳhudā na thā

ḳhudā kā shukr sohbat kā asar hotā nahīñ ham par
adākāroñ meñ rah kar bhī adākārī nahīñ aa.ī

vahī taaj hai vahī taḳht hai vahī zahr hai vahī jaam hai
ye vahī ḳhudā kī zamīn hai ye vahī butoñ kā nizām hai

ab ḳhudā ke liye rakh ham pe karam ai nāseh
haiñ pareshāñ tirī bakvās se ham ai nāseh

'hakīm' is se ḳhudā mahfūz rakkhe
ye sarkash nafas mār-e-āstīñ hai

mujh ko ḳhvāhish hī DhūñDne kī na thī
mujh meñ khoyā rahā ḳhudā merā

dekheñge butoñ kī ham kajī ko
sīdhā hai agar ḳhudā hamārā

ḳhud dekh ḳhudī ko o ḳhud-ārā
pahchān ḳhudā ko bhī ḳhudā-rā

ḳhud farishte to nahīñ haiñ jo mujhe le jā rahe haiñ
bande mujh ko kyuuñ ḳhudā ke sāmne le jā rahe haiñ

rakh diyā dair-o-haram meñ us ko rakhne ko 'rafīq'
dekhnā merī tarah merā ḳhudā rakhtā hai kaun

jo aa rahī hai sadā ġhaur se suno us ko
ki is sadā meñ ḳhudā boltā sā lagtā hai

mere vatan pe utarte hue añdheroñ ko
jo tum kaho mujhe qahr-e-ḳhudā sā lagtā hai

umr bhar kī navā-garī kā sila
ai ḳhudā koī ham-navā hī de

ba-ḳhudā haiñ tirī hindū bu-e-mai-ḳhvār āñkheñ
nashshe kī Dorī nahīñ pahne haiñ zunnār āñkheñ

garche ḳhudā ko aap ne māh-e-laqā banā diyā
us ke firāq meñ 'jamīl' kījiye shā.erī kuchh aur

is kā ḳhudā sanam sanam us kā ḳhudā haram haram
ishq kī gumrahī kuchh aur aql kī gumrahī kuchh aur