Tags-Khuda

ḳhudā ke nām-levā ham bhī haiñ tum bhī ho aur vo bhī
magar afsos sab apnī ḳhudī ko jiite rahte haiñ

faqīh-e-shahr ne be-zār kar diyā varna
diloñ meñ qadr bahut ḳhāna-e-ḳhudā kī thī

ḳhudā bachā.e tirī mast mast āñkhoñ se
farishta ho to bahak jaa.e aadmī kyā hai

ḳhudā kā shukr hai ham ik fazā meñ saañs lete haiñ
agar milte nahīñ itnā to itmīnān rahtā hai

ḳhudā sharmā.e hāthoñ ko ki rakhte haiñ kashākash meñ
kabhī mere garebāñ ko kabhī jānāñ ke dāman ko

ḳhudā ne azmat-e-insāiyat baḳhshī unheñ ai 'shād'
tasavvuf meñ ḳhudī ab shādmāñ ma.alūm hotī hai

bait-us-sanam meñ jā kar hamdam ba-rabb-e-ka.aba
laayā huuñ us sanam ko ghar tak ḳhudā ḳhudā kar

aarzū kī ye sazā hai ki zamāna hai ḳhilāf
un se milne kī ḳhudā jaane sazā kyā hogī

kis qadar majbūr hoñge us ghaḌī ham ai ḳhudā
jab tire be-faiz bandoñ ko ḳhudā ham ne kahā

be-vafāoñ ko vafāoñ kā ḳhudā ham ne kahā
kyā hameñ kahnā thā ai dil aur kyā ham ne kahā

jahāñ meñ zar kā hai kārḳhāna na koī apnā na hai yagāna
talāsh-e-daulat meñ hai zamāna ḳhudā hī hāfiz hai muflisī kā

ḳhudā kare tirī zulf-e-siyah kī umr darāz
kabhī balā mujhe lenā kabhī duā denā

dil-e-tabāh kā 'fāzil' ḳhudā hī hāfiz hai
ki ab hai aur hī kuchh dard-o-iztirāb kā rañg

hindū haiñ but-parast musalmāñ ḳhudā-parast
pūjūñ maiñ us kisī ko jo ho āshnā-parast

ye tamannā hai ḳhudā ālam-e-hastī meñ tire
maiñ ayaañ dekhnā chāhūñ to nihāñ tak dekhūñ

in shoḳh hasīnoñ kī nirālī hai adā bhī
but ho ke samajhte haiñ ki jaise haiñ ḳhudā bhī

jo bhī denā hai vo ḳhudā degā
aadmī aadmī ko kyā degā

dil hai qadmoñ par kisī ke sar jhukā ho yā na ho
bandagī to apnī fitrat hai ḳhudā ho yā na ho

zarā uThā.iye tābūt apne āshiq kā
ḳhudā kī raah kā karte haiñ kaam uTh uTh kar

ḳhudā biThā.e agar karbalā meñ mujh ko 'munīr'
phirūñ maiñ gird-e-mazār-e-imām uTh uTh kar