Tags-Khuda

kam-ayārī ne ḳhudā-soz banāyā aisā
but to sab yaad rahe ek ḳhudā bhuul ga.e

mire ghar meñ to koī bhī nahīñ hai
ḳhudā jaane maiñ kis se Dar rahā huuñ

aap taklīf-e-tavajjoh na kareñ bahr-e-ḳhudā
zindagī jaise bhī guzregī guzar jā.egī

ye mujh se saḳht-jāñ par shauq ḳhanjar-āzmā.ī kā
ḳhudā-hāfiz mire qātil tirī nāzuk kalā.ī kā

maiñ bhī banda hī thā ḳhudā kī qasam
ye alag hai ki barguzīda rahā

nahīñ mujh ko tujh se koī gila hai alag tarah mirā silsila
ki tire ḳhudā ka.ī aur haiñ to mirā ḳhudā koī aur hai

har ek daur kā maz.hab nayā ḳhudā laayā
kareñ to ham bhī magar kis ḳhudā kī baat kareñ

merī nazar meñ ye bhī ibādat ḳhudā kī hai
shafqat bharī nigāh se bachchoñ ko dekhnā

ik ḳhalā, ek lā-intihā aur maiñ
kitne tanhā haiñ merā ḳhudā aur maiñ

mohabbat kā ḳhudā huuñ maiñ magar aisā ḳhudā jis ne
baḌī mushkil se apnā ek banda gher rakkhā hai

chalo ham farhat-'ehsās' apnā masjid se chhuḌā laa.eñ
ḳhudā vāloñ ne ik kāfir hamārā gher rakkhā hai

koī īmān vaalā ahl-e-masjid se kahe jā kar
ḳhudā ko kyuuñ unhoñne kāfirāna gher rakkhā hai

butoñ kā zikr kar vaa.iz ḳhudā ko kis ne dekhā hai
sharār-e-sañg muusā ke liye barq-e-tajallā hai

ye hindustān hai yaañ par butoñ kā roz mela hai
ḳhudā jaane vo but ai 'mehr' devī hai ki durgā hai

āñkhoñ kā ḳhudā hī hai ye aañsū kī hai gar mauj
kashtī bache kyūñkar jo rahe aaTh pahar mauj

gayā din huī shaam aa.ī hai raat
ḳhudā ne ajab shai banā.ī hai raat

mire ḳhudā mujhe ab husn kī bashārat de
maiñ us ke shahr pe ilhām honā chāhtā huuñ

ye mirī ḳhudā.ī thī yā tirī ḳhudā jaane
merī lan-tarānī par terī be-zabānī thī

thī zindagī ḳhudā kā ġhazab aur 'maz.harī'
maut ik ḳhudā kā pyaar hai le us kā pyaar dost

darmiyāñ chīḳhte insānoñ ke
merā ḳhāmosh ḳhudā raqs meñ hai