Tags-Khuda

qayāmat aa.ī hai halchal hai āsmānoñ par
na phiriye bahr-e-ḳhudā baam baam uTh uTh kar

nahīñ koī dil meñ tire sivā tū mirā sanam hai mirā ḳhudā
mire dil ko jis se jilā mile unheñ nisbatoñ se navāz de

sabhī mai-kash tavāzun kho rahe haiñ
ḳhudā se be-takalluf ho rahe haiñ

ḳhudā kī raah meñ sab kuchh luTā kar baiThne vaale
ḳhudā kī kul ḳhudā.ī apnī hī jāgīr dekheñge

liyā na dil ne mire sahārā ubhartī maujoñ kā shorishoñ kā
maiñ apnī is kashtī-e-shikasta kā aap hī nā-ḳhudā rahā huuñ

mirī musībat ye kah rahī hai ḳhudā mujhe aazmā rahā hai
mirī ibādat ye kah rahī hai ḳhudā ko maiñ aazmā rahā huuñ

vo sukh vahāñ ki ḳhudā kī haiñ baḳhshisheñ kyā kyā
yahāñ ye dukh ki ḳhudā bhī nahīñ rahā ab to

ai chashm az-barā.e-ḳhudā gar madad kare
a.amāl-nāma apnā to ro ro ke dhoiye

ḳhudā kā ghar na baḳhshā zālimoñ ne
ka.ī dair-o-haram TuuTe hue haiñ

samajhte haiñ ḳhudā-ma.alūm kyā kuchh kārvāñ vaale
zabāñ meñ apnī mīr-e-kārvāñ kuchh aur kahtā hai

juuñ juuñ nahīñ dekhe hai 'nisār' apne sanam ko
tuuñ tuuñ yahī kahtā hai ḳhudā jāniye kyā hai

yaqīn aayā hai aaj alvāh-e-sa.ang paḌh kar
ki is nagar meñ bas ek nām-e-ḳhudā rahegā

tū ne har naḳhl meñ kuchh zauq-e-numū rakkhā hai
ai ḳhudā mere panapne kī alāmat koī

sab kuchh ḳhudā se maañg liyā tujh ko maañg kar
uThte nahīñ haiñ haath mire is duā ke ba.ad

jaate to ho ka.abe ko ḳhudā ke liye 'mā.il'
karnā na kisī dushman-e-īmāñ kī shikāyat

ḳhudā kī shaan vo ḳhud ho rahe haiñ dīvāne
jo rāh-e-dasht se aa.e the ham ko palTāne

chale to haiñ ki dikhā.eñge un ko chiir ke dil
pahuñch sakeñge ham un tak ye ab ḳhudā jaane

nikal chale to haiñ tarġhīb-e-dil pe ham ghar se
kahāñ lageñge Thikāne ye ab ḳhudā jaane

ḳhudā ke dāman-e-rahmat se apnā dāman-e-isyāñ
vo kyā Tāñkegā jis ke aañkh meñ Dore nahīñ rahte

phireñge hashr meñ gard-e-dil-e-yagāna-e-ishq
kareñge pesh-e-ḳhudā ham tavāf-e-ḳhāna-e-ishq