Tags-Khuda

kabhī dard-āshnā terā bhī qalb shādmāñ hogā
kabhī nām-e-ḳhudā tū bhī to ai kam-sin javāñ hogā

vaqt-e-māyūsī hai koī aasrā baaqī rahe
ye duā hai āsmānoñ par ḳhudā baaqī rahe

ye ik savāl hai shikva nahīñ gila bhī nahīñ
mire ḳhudā tirā lutf-o-atā hai kis ke liye

barham haiñ vo ġhair be-hayā se
māñgeñ kuchh aur bhī ḳhudā se

ḳhush rakhe aap ko ḳhudā har pal
muflisī kā savāb le jaao

nāḳhudā bhī nahīñ ḳhudā bhī nahīñ
koī merā tire sivā bhī nahīñ

maiñ ne kahā ki hazrat aap apnī tarf dekheñ
jo in butoñ se hogā so hogā vo ḳhudā se

lete haiñ tirā naam hī yuuñ jāgte sote
jaise ki hameñ apnā ḳhudā yaad nahīñ hai

tum apne aap ko kuchh bhī kaho maz.hab ke dīvāno
na dekhā koī tum jaisā ḳhudā-nā-āshnā maiñ ne

laayā hai ishq ne mujhe aise maqām par
ḳhud-āgahī rahī na ḳhudā-āgahī rahī

sun to sahī jahāñ meñ hai terā fasāna kyā
kahtī hai tujh ko ḳhalq-e-ḳhudā ġhā.ebāna kyā

kahāñ jaanā hai tham-tham kar chalo aisī bhī kiyā jaldī
tum hī tum ho ḳhudā rakkhe nazar paḌtī hai aalam kī

nahīñ milte na miliye ḳhair koī mar na jā.egā
ḳhudā kā shukr hai pahle mohabbat aap ne kam kī

use kyā zarūrat thī vo jāntā hai
jo ghar meñ parāyā ḳhudā le gayā vo

rahā vo jirgā jise char ga.ī hai añgrezī
so vaañ ḳhudā kī zarūrat na ambiyā darkār

aisī havā bahī ki hai chāroñ taraf fasād
juz sāya-e-ḳhudā kahīñ dār-ul-amāñ nahīñ

kuchh tumheñ tars-e-ḳhudā bhī hai ḳhudā kī vāste
le chalo mujh ko musalmāno usī kāfir ke paas

ġham-e-hijr ke ga.e din guzar huā āḳhir apnā visāl hī
pa ye kyā ġhazab hai pa.e-ḳhudā tujhe aaj tak hai malāl hī

ek bosa māñgtā hai tum se 'hātim' sā gadā
jāniyo rāh-e-ḳhudā meñ ye bhī ik ḳhairāt kī