Tags-Khuda

ḳhudā ko kyā kahūñ paayā na paayā
ki vasl-e-be-ḳhudī aslā na paayā

hai ḳhud-shanāsī jahāñ-shanāsī jahāñ-shanāsī ḳhudā-shanāsī
milī jo tujh ko ḳhudī kī daulat to daulat-e-sarmadī milegī

dil-e-sāfī ye ho ai 'mehr' ḳhudā kī rahmat
maiñ ne mahsūs kiyā hai bahut ārām yahāñ

zindagī tujh ko tire dard ke har ik pal ko
ham ne jis tarah guzārā hai ḳhudā jāntā hai

merī har raah guzartī hai tire kūche se
tū mirā qutbī sitāra hai, ḳhudā jāntā hai

gar hameñ terā sahārā hai, ḳhudā jāntā hai
phir to har zulm gavāra hai, ḳhudā jāntā hai

dil dhaḌaktā hai to uThtī haiñ badan meñ Tīseñ
ishq ne bāñdh ke maarā hai, ḳhudā jāntā hai

baiThā rahtā hai jahāñ hijr kā tanhā aañsū
merī āñkhoñ kā kināra hai, ḳhudā jāntā hai

phir zabān-e-ḳhudā pe lafz-e-kun
jashn kā ehtimām ho jaa.e

kiyā ījād jis ne bhī ḳhudā ko
vo ḳhud ko kaise bahlātā thā pahle

pesh-e-ḳhudā roz-e-jazā maiñ bhī huuñ chup qātil bhī chup
goyā khaḌe haiñ be-dahan ek is taraf ek us taraf

koī aniis koī āshnā nahīñ rakhte
kisī kī aas baġhair az ḳhudā nahīñ rakhte

nā-ḳhudāoñ pe bharosa na Dubo de 'āmir'
qurb-e-sāhil jo tujhe degā ḳhudā hī degā

ḳhudā-hāfiz magar ab zindagī meñ
faqat apnā sahārā rah gayā hai

aaj behosh ho gayā 'aḳhtar'
kyā huā kyā huā ḳhudā jaane

hāl-e-dil ai buto ḳhudā jaane
sach hai sach is ko ġhair kyā jaane

is añdhere meñ jab koī bhī na thā
mujh se gum ho gayā ḳhudā mujh meñ

dil ḳhudā jaane kidhar gum ho gayā ai dostāñ
DhūñDhte phirte haiñ kab se aur nahīñ paate haiñ ham

ḳhudā gavāh ḳhudā to nahīñ vo shaḳhs magar
usī kā naam mukarrar laboñ pe aa.e hai

dil ba-az-kāba hai yārāñ jubba-sā.ī chāhiye
hai ḳhudā kā ghar yahī lekin safā.ī chāhiye