Tags-Khuda

ḳhudā ko bhī nahīñ dil māntā hai
mohabbat hī mohabbat jāntā hai

zikr chheḌā ḳhudā kā phir tū ne
yaañ hai insāñ bhī rā.egāñ chup rah

ahrman ho ḳhudā ho yā aadam
ho chukā sab kā imtihāñ chup rah

ḳhudā vo din na dikhā.e ki in dayāroñ meñ
sab āñkheñ rakhte huuñ aur dīda-var bhī koī na ho

simaT ke aa ga.ī duniyā qarīb-e-mai-ḳhāna
koī batāo yahī ḳhāna-e-ḳhudā to nahīñ

kaash kar lete kabhī ka.aba-e-dil kā bhī tavāf
vo jo patthar ke makānoñ se ḳhudā māñgte haiñ

tere kahne se maiñ ab lā.ūñ kahāñ se nāseh
sabr jab is dil-e-muztar ko ḳhudā ne na diyā

dimāġh de jo ḳhudā gulshan-e-mohabbat meñ
har ek gul se tire pairahan kī bū aa.e

fareb khaa.e hue zulm o jaur insāñ ke
ḳhudā kī ḳhaas adālat ke dād-ḳhvāh chale

ḳhudā kare koī sham.eñ liye chalā aa.e
dhaḌak rahe haiñ mire dil meñ shaam ke saa.e

us mard-e-ḳhudā-mast kī kyā baat hai 'akbar'
jis ko na rahā kuchh bhī bajuz yād-e-ḳhudā yaad

laraz rahe haiñ satāne vaale ḳhudā ke aage ka.ī haiñ naale
gurez un se karegā mahshar ye vo qayāmat bapā kareñge

nahīñ ḳhush-a.amāl agar nahīñ huuñ farishte turbat meñ ḳhashmagīñ hoñ
ḳhudā kī rahmat se mutma.in huuñ ye kyā kareñge vo kyā kareñge

kisī kā ehsān ham na leñge kisī ko taklīf kuchh na deñge
ḳhudā ne paidā kiyā hai ham ko ḳhudā hī se iltijā kareñge

baḌhā to hai rabt ham se tum se ḳhudā ne chāhā to dekh loge
tumhāre pahlū meñ yaar dil kī tarah hamesha rahā kareñge

hameñ jo be-jurm pīste ho ye jānte ho ki kyā kareñge
ḳhudā ne chāhā to surma ho kar tumhārī āñkhoñ meñ jā kareñge

ḳhudā-o-ahrman badle vo īmān-e-duī badlā
hudūd-e-ḳhair-o-shar badle mazāq-e-kāfirī badlā

itnī tire insāf kī dekhī haiñ misāleñ
lagtā hī nahīñ mulk tirā mulk ḳhudā kā

apnā to nahīñ thā maiñ kabhī aur ġhamoñ ne
maarā mujhe aisā rahā terā na ḳhudā kā

fazl-e-ḳhudā se apnī tabī.at hai be-niyāz
rū-e-talab kabhī na huā daad kī taraf