Tags-Khuda

maiñ sochtā hū ki apne ḳhudā se kah Dālūñ
vo sab jo maiñ ne kabhī aaj tak kahā hī nahīñ

phir banāyā ḳhudā ne aadam ko
apnī sūrat pe aisī sūrat meñ

ai ḳhudā jo kahīñ nahīñ maujūd
kyā likhā hai hamārī qismat meñ

sāhib-e-mehr-o-vafā arz-o-samā kyuuñ chup hai
ham pe to vaqt ke pahre haiñ ḳhudā kyuuñ chup hai

mire allāh ye patthar ki butoñ kā dil hai
rahm rusvā.ī kā Dar ḳhauf-e-ḳhudā kuchh bhī nahīñ

ai ḳhudā baḳht-sinkandar mat de
aur kashkol-gadā.ī bhī nahīñ

ḳhudā jaane girebāñ kis ke haiñ aur haath kis ke haiñ
añdhere meñ kisī kī shakl pahchānī nahīñ jaatī

butāñ kī 'mīr' sitam vo nigāh hai jis ne
ḳhudā ke vāste bhī ḳhalq kā vabāl liyā

jo mirī riyāzat-e-nīm-shab ko 'salīm' sub.h na mil sakī
to phir is ke ma.anī to ye hue ki yahāñ ḳhudā koī aur hai

mamnūñ hī rahā us but-e-kāfir kī jafā kā
shikva na kiyā dil ne kabhū shukr ḳhudā kā

teġh-e-sitam se us kī mirā sar judā huā
shukr ḳhudā ki haq mohabbat adā huā

hamārī laġhzish-e-pā par na yuuñ hañso tanzan
ḳhudārā baḌh ke uThā lo ḳhudā kā ḳhauf karo

hameñ bhī raah dikhā do baḌā añdherā hai
jahāñ meñ raushnī vaalo ḳhudā kā ḳhauf karo

na jaao kār-e-mohabbat meñ chhoḌ kar tanhā
zarā sā haath baTā lo ḳhudā kā ḳhauf karo

chamak kar aur baḌhāo na merī siyah-baḳhtī
baḌe gharoñ ke ujālo ḳhudā kā ḳhauf karo

diloñ ko toḌne vaalo ḳhudā kā ḳhauf karo
gire huoñ ko uThā lo ḳhudā kā ḳhauf karo

hai to vaa.iz ḳhudā-parast magar
lab pe zikr-e-butāñ ziyāda hai

maiñ nai tanhā.ī se tañg aa ke use yaad kiyā
ab mire saath hī rahtā hai ḳhudā zindāñ meñ

ḳhudā kī qasam phir to kyā ḳhair hove
ham aur tum akele hoñ aur sair hove

jafāoñ kī bhī had hotī hai koī
ḳhudā ma.alūm us ke dil meñ kyā hai