Tags-Khuda

go haram ke rāste se vo pahuñch ga.e ḳhudā tak
tirī rahguzar se jaate to kuchh aur baat hotī

ḳhudā kā shukr hai tuj saltanat the kaam paayā huuñ
dannadī dushman ke mukh par piyūtā mai arġhuvānī kā

tū ḳhudā hone kī koshish to karegā lekin
ham tujhe aañkh se ojhal nahīñ hone deñge

ḳhudā kisī ko bhī ye ḳhvāb-e-bad na dikhlā.e
qafas ke sāmne jaltā hai āshiyāñ apnā

ḳhvāh kāfir mujhe kah ḳhvāh musalmān ai shaiḳh
but ke hāthoñ meñ bikāyā huuñ ḳhudā kī saugand

ḳhudā ke vāste aa darguzar gunah se mire
na hogā phir kabhū ai tund-ḳhū huā so huā

ab to sab ko hī aazmā baiThe
mā-sivā ḳhud ke aur ḳhudā ke sivā

sab dikhāte haiñ aag ḳhirman ko
hai muhāfiz koī ḳhudā ke sivā

ḳhudā jaane kyā hogā anjām is kā
maiñ be-sabr itnā huuñ vo tund-ḳhū hai

jo na dekhā thā vo bhī dekh liyā
ab dikhātā hai kyā ḳhudā dekheñ

ka.abe meñ jāñ-ba-lab the ham dūrī-e-butāñ se
aa.e haiñ phir ke yaaro ab ke ḳhudā ke haañ se

isī umiid pe 'hamdam' gunāh kartā huuñ
ḳhudā ke ghar meñ karam kī kamī nahīñ hotī

ḳhudā vaalo na roko mujh ko mere zauq-e-isyāñ se
mujhe roz-e-qayāmat morid-e-ilzām hone do

ḳhudā ma.alūm le jaa.e kahāñ zauq-e-talab mujh ko
abhī to be-ḳhudī-e-shauq kā anjām hone do

us se kah do ki vo jafā na kare
kahīñ mujh sā use ḳhudā na kare

maiñ ġhazal kī shabnamī aañkh se ye dukhoñ ke phuul chunā karūñ
mirī saltanat mirā fan rahe mujhe tāj-o-taḳht ḳhudā na de

maiñ roz phone par us ko sadā.eñ detā huuñ
ḳhudā ke saath mirā rābta nahīñ hotā

ab kahāñ tak pattharoñ kī bandagī kartā phirūñ
dil se jis dam bhī pukārūñgā ḳhudā mil jā.egā

ziist be-rabt hai par hai to ḳhudā kī ne.amat
jis tarah se bhī ye nibhtī hai nibhā lī jaa.e

samajh hai aur tumhārī kahūñ maiñ tum se kyā
tum apne dil meñ ḳhudā jaane sun ke kyā samjho