Tags-Ada

TuuTe hue makāñ kī adā dekhtā koī
sarsabz thī muñDer kabūtar siyāh thā

charāġh-e-tūr jale ā.ina-dar-ā.īna
hijāb barq-e-adā ne uThā.e haiñ kyā kyā

adā ye siikh hī letā agar pata hotā
saroñ ke daam to lagne haiñ kaj-kulāhī pe

tumhāre vāste is dil kā mol hī kyā hai
adā se dekh lo ik din nazar uThā ke mujhe

adā se khīñch rahā hai kamāñ vo tīr-andāz
qazā pukār rahī hai zarā bachā ke mujhe

merā qarza adā kare koī
taak meñ huuñ ḳhatā kare koī

rah ga.e aġhyār sab hairān-o-shashdar ai 'umīd'
is adā se aaj un kī anjuman meñ ham ga.e

lahū taaza zamīñ par thūkne se
junūñ kā haq adā ho jā.egā kyā

adā hamīñ ne sikhā.ī nazar hamīñ ne dī
hamīñ se aañkh churāo ho yaar dekho to

vo chup bhī baiThe hai to aisā ban ke baiThe hai
har ik adā ye kahe hai pukār dekho to

badalte vaqt ne badle mizāj bhī kaise
tirī adā bhī ga.ī merā bāñkpan bhī gayā

imkān-e-asar par sham.a-e-duā
bujhne kī adā kā naam rahī

tirī ik adā thī ye bhī gul-o-ḳhār ko jagāne
jo nasīm-e-sub.h-gāhī kā ḳhirām ban ke aa.ī

ab na ḳhatra hai dil meñ na koī ḳhalish ek baaqī rahā hai to rañg-e-tapish
dil subuk aur saada hai is taur se qarz jitne the goyā adā ho ga.e

pairāhan-e-jāñ chaak rahe tez havā meñ
tūfān meñ jiine kī adā chāhiye yaaro

vo qibla is galī se jā chukā thā
namāz-e-dil adā hone se pahle

ab vo shāloñ kā qafas ho ki lahū kī ḳhushbū
dil pe lahrātī rahī barq-e-adā kyā karte

yūñhī mausam kī adā dekh ke yaad aayā hai
kis qadar jald badal jaate haiñ insāñ jānāñ

ek ek adā hosh-talab dushman-e-īmāñ
vo yūsuf-e-sānī ba-ḳhudā rashk-e-qamar hai

na kyuuñ hoñ is adā par ishq kī ḳhuddāriyāñ sadqe
unheñ rūdād-e-ġham sun sun ke hairat hotī jaatī hai