Tags-Khwab

vus.ateñ maidān kī sūraj ke chhup jaane se tañg
sabza-e-afsurda par ḳhvāb-āfrīñ halkā sā rañg

parda-hā-e-ḳhvāb ho jaate haiñ jis se chaak chaak
muskurā kar apnī chādar ko haTā detī hai ḳhaak

ḳhvāb-e-āzādī insāñ kī ye ta.abīr nahīñ
ye vatan terī mirī nasl kī jāgīr nahīñ

kyā koī ḳhvāb abhī dekhā thā
aañkh maltī hai haqīqat kaisī

vo bāda-e-shabāna kī sarmastiyāñ kahāñ
uThiye bas ab ki lazzat-e-ḳhvāb-e-sahar ga.ī

duḳhtaran-e-maġhribī ko de na aurat kā ḳhitāb
ye mujassam ho ga.e haiñ kuchh gunahgāroñ ke ḳhvāb

jo tabassum chhīn lete haiñ shab-e-mahtāb se
jin kī barnā.ī jagātī hai diloñ ko ḳhvāb se

us husn se kuchh hastī meñ tirī azdād hue the aa ke baham
ik ḳhvāb-o-haqīqat kā sañgam miTTī pe qadam nazroñ meñ iram

go ki baaqī nahīñ kaifiyyat-e-tūfān-e-shabāb
phañs ke janjāl meñ duniyā ke ye qissa huā ḳhvāb

farsh-e-gul vaalo zamīñ par log mahv-e-ḳhvāb haiñ
ḳhirmanoñ ke pāsbānoñ bijliyāñ betāb haiñ!!

terī bedārī nahīñ hai ik musalsal ḳhvāb hai
kyā tū vāqif hai ki ismat gauhar-e-nāyāb hai

ye bazm-e-ḳhvāb-e-sarsayyad ye naqsh-e-azmat-e-rafta
mai-e-īsār se labrez hai ik jām-e-nūrānī

ḳhvāb vaise to ik ināyat hai
aañkh khul jaa.e to musībat hai

ye shab-e-darāz bhī kaT ga.ī vo sitāre Duube vo pau phaTī
sar-e-rāh ġhaflat-e-ḳhvāb se ab uTho ki vaqt-e-sahar bhī hai

ye ḳhvāb hai ḳhushbū hai ki jhoñkā hai ki pal hai
ye dhund hai bādal hai ki saayā hai ki tum ho

abas āsūdgān-e-ḳhāk ko bad-ḳhvāb karte ho
abhī se kyuuñ machā rakkhā hai hañgāma qayāmat kā

ab takalluf bartaraf ye aap ko ma.alūm hai
kyuuñ mirā ḳhvāb-e-vafā ta.abīr se mahrūm hai

ḳhvāb āḳhir ḳhvāb hai is ḳhvāb kā kyā e'tibār
jannat-e-nazzāra goyā jannat-e-mauhūm hai

kyuuñ shaam ko bāhoñ meñ ulajhne kī havas hai
kyuuñ sub.h kī palkoñ meñ koī ḳhvāb chhupā hai

ḳhvāb-hā-ḳhvāb jis ko chāhā thā
rañg-hā-rañg usī ko bhuul gayā