Tags-Khwab

aarzū aur ḳhvāb le jaao
har amānat janāb le jaao

us kī be-ḳhvāb āñkhoñ meñ jhāñko kabhī us ko samjho kabhī
us ko bedār rakhtā hai kyā vāqi.a shahr vaalo suno

ham se shart lagāne kī ik sūrat hai
apne saare ḳhvāb yahāñ maidān meñ rakh

mai hai terī āñkhoñ meñ aur mujh pe nasha sā taarī hai
niiñd hai terī palkoñ meñ aur ḳhvāb mujhe dikhlā.e hai

sunā hai ḳhvāb mukammal kabhī nahīñ hote
sunā hai ishq ḳhatā hai so kar ke dekhte haiñ

hamāre ishq kī mīrās hai bas ek hī ḳhvāb
to aao ham use tābīr kar ke dekhte haiñ

ik sabz shāḳh gulāb kī thā ik duniyā apne ḳhvāb kī thā
vo ek bahār jo aa.ī nahīñ us ke liye sab kuchh haar diyā

raat itnī jā chukī hai aur sonā hai abhī
is nagar meñ ik ḳhushī kā ḳhvāb bonā hai abhī

lagtā hai maiñ pyaas se marne vaalā huuñ
maiñ ne kal shab ḳhvāb meñ sahrā dekhā hai

qaidī raat ko bhāgne vaalā hai 'tābish'
us ne ḳhvāb meñ ḳhufiya rasta dekhā hai

use gale se lagānā to ḳhvāb Thahrā hai
yahī bahut hai jo us se kalām kar aa.e

ārzūoñ ko anā-gīr nahīñ kar sakte
ḳhvāb ko paaoñ kī zanjīr nahīñ kar sakte

ārām-e-jāñ thā ḳhvāb-e-sukūñ aañkh jab khulī
sail-e-fanā utar gayā miTTī bikhar ga.ī

ek sannāTā sā taqrīr meñ rakkhā gayā thā
ḳhvāb hī ḳhvāb kī ta.abīr meñ rakhā gayā thā

yahāñ se chāroñ taraf rāste nikalte haiñ
Thahar Thahar ke ham is ḳhvāb se nikalte haiñ

jaane kab aa.egā vo merī mohabbat kā safīr
mere har ḳhvāb kī ta.abīr batāne ke liye

ye ḳhvāb hai ki hai tābīr-e-ḳhvāb ai ġham-e-dil
har ik qadam hai yahāñ umr-e-rā.egāñ kī talāsh

us kā ḳhayāl ḳhvāb ke dar se nikal gayā
phir maiñ bhī apne dīda-e-tar se nikal gayā