Tags-Khwab

maiñ huuñ ik paikar-e-ḳhayāl-o-ḳhvāb
aur kitnī baḌī haqīqat huuñ

in dinoñ ye hālat hai merī ḳhvāb-e-hastī meñ
phir rahā huuñ maiñ jaise ik ḳharāb bastī meñ

ab yahī shakl-e-tamannā hai ki ham
umr bhar ḳhvāb-e-tamannā dekheñ

āb-jū ham haiñ pa dariyā ke hamāre sabhī ḳhvāb
radd-e-ta.abīr kī barsāt meñ bah jaate haiñ

āñkhoñ se chun kar sab TūTe-phūTe ḳhvāb
patthar kī ḳhvāhish ban jā.ūñgī maiñ bhī

kyā hue sūrat-nigārāñ ḳhvāb ke
ḳhvāb ke sūrat-nigārāñ kyā hue

shab-hā.e-aish kā vo zamāna kidhar gayā
vo ḳhvāb kyā huā vo fasāna kidhar gayā

mahfūz mire ḳhvāb ko batlātā nahīñ hai
ik aks-e-taraddud meñ nigah-dār kā honā

maiñ kaise chhoḌ duuñ TuuTe hue dar-o-dīvār
shikasta ḳhvāb kā tanhā makān baaqī hai

āñkhoñ ko sab kī niiñd bhī dī ḳhvāb bhī diye
ham ko shumār kartī rahī dushmanoñ meñ raat

mujh par ai mahram-e-jāñ parda-e-asrār kuuñ khol
ḳhvāb-e-ġhaflat señ uThā dīda-e-bedār kuuñ khol

ajal kī niiñd meñ bhī ḳhvāb-e-hastī gar nazar aayā
to phir bekār hai tañg aa ke is duniyā se mar jaanā

kyuuñ havā tez chalī niiñd se vo jaag paḌā
ḳhvāb TuuTā hai to ilzām mujhe hī degā

jaise koī ziddī bachcha kab bahle bahlāne se
aise ham duniyā se chhup kar dekheñ ḳhvāb suhāne se

mirī dhaḌkanoñ ke qarīb the mirī chaah the mirā ḳhvāb the
vo jo roz-o-shab mire paas the vahī log mujh se bichhaḌ ga.e

hayāt ḳhvāb-gahoñ meñ panāh DhūñDtī hai
fasurda lamhe ḳhalāoñ meñ rañg bharte haiñ

ḳhvāb se jab vo bedār hone lage
phuul bāloñ meñ apne pirone lage

thā ḳhvāb meñ ḳhayāl ko tujh se muāmla
jab aañkh khul ga.ī na ziyāñ thā na suud thā

ḳhvāhishoñ ke ḳhūbsūrat qasr kī ta.amīr kar
kar mujassam ḳhvāb ko me.amār ko tasvīr kar

ik ḳhvāb ḳhazāna nīñdoñ kā vo ham sab ne barbād kiyā
ik niiñd ḳharāba ḳhvāboñ kā aur ham sab is meñ rahte haiñ