Tags-Khwab

sitāre jāgte haiñ raat laT chhaTkā.e sotī hai
dabe paañv kisī ne aa ke ḳhvāb-e-zindagī badlā

abhī talak jo ḳhvāb the charāġh the gulāb the
vo rahguzar koī na thī ki jis pe tū milā nahīñ

vo jo ārzūoñ ke ḳhvāb the vo ḳhayāl the vo sarāb the
sar-e-dasht ek bhī gul na thā jise āñsuoñ se sañvārte

ḳhatm huī shab-e-vafā ḳhvāb ke silsile ga.e
jis dar-e-nīm-bāz ke pesh the marhale ga.e

vaqt har baar badaltā huā rah jaatā hai
ḳhvāb ta.abīr meñ Dhaltā huā rah jaatā hai

vo ḳhvāb dikhāte hai sākār nahīñ karte
ulfat se magar khul ke inkār nahīñ karte

aañkh ab ḳhvāb nahīñ de saktī
raushnī maañg le saa.il mere

ḳhvāb meñ jo kuchh dekh rahā huuñ us kā dikhānā mushkil hai
ā.īne meñ phuul khilā hai haath lagānā mushkil hai

shīsha-garoñ ke ghar meñ sunā hai ek parī kal aa.ī thī
vaise ḳhayāl-o-ḳhvāb haiñ pariyāñ un kā aanā mushkil hai

koī is ḳhvāb kī ta.abīr batā saktā hai
roz aate haiñ mujhe ḳhvāb Darāne vaale

maiñ ḳhvāb ḳhvāb thā har jashn-e-ārzū kā asiir
khulī jo aañkh to apne hī ghar kī qaid meñ thā

jaise ik ḳhvāb huā ahd-e-guzishta kā sabāt
dam-e-ā.inda mirī aas kā dhokā hī na ho

tābinda-ḳhvāb dekh kar āñkheñ khuleñgī jab
zulmāt ke baġhair yahāñ kuchh na pāoge

phir koī gul khile sar-e-mizhgāñ
phir dar-e-ḳhvāb koī vā kar de

ik sitāre ko baḳhsh kar mire ḳhvāb
phir use merā aa.ina kar de

ḳhudā kisī ko bhī ye ḳhvāb-e-bad na dikhlā.e
qafas ke sāmne jaltā hai āshiyāñ apnā

kab se baiThe haiñ mirī aañkh kī añgnā.ī meñ
ḳhvāb bachchoñ kī tarah shor machāne ke liye

na aa.ī jāgtī āñkhoñ ke dā.ere meñ kabhī
ye bad-nasīb kā ik ḳhvāb hai ḳhushī kyā hai

kaun ta.abīr un ko de 'dā.em'
ḳhvāb haiñ sab dhuāñ dhuāñ mere