Tags-Khwab

ik shahr-e-tishna-kām meñ jiite haiñ yuuñ 'sahar'
aatā hai roz ḳhvāb meñ dariyā kā silsila

ab to vo mausam purāne ho ga.e
ab to vo bāteñ haiñ saarī ḳhvāb kī

niind bhī jāgtī rahī puure hue na ḳhvāb bhī
sub.h huī zamīn par raat Dhalī mazār meñ

khule daroñ se talabgār ḳhvāb-gāheñ magar
maiñ jāgtā rahā ik ḳhvāb-ham-kanār ke saath

tamannā kī kise parvā ki sone jāgne meñ
mayassar haiñ bahut ḳhvāb-e-tamannā dekhne ko

lahrāne lage kyuuñ mirī palkoñ meñ hasīñ ḳhvāb
ye sāya-e-gesū-e-pareshāñ to nahīñ hai

din ko hamāre paas vo chanchal kaahe ko āvegā ai dil
raat ko ik dam ḳhvāb meñ aanā jis ne idhar kā chhoḌ diyā

ek hī mas.ala tā-umr mirā hal na huā
niiñd puurī na huī ḳhvāb mukammal na huā

vo sarmastiyāñ baḳhsh ai rashk-e-shīrīñ
ki ḳhusrū ko ḳhvāb-e-adam se jagā deñ

shahr ke dukāñ-dāro kārobār-e-ulfat meñ suud kyā ziyāñ kyā hai tum na jaan pāoge
dil ke daam kitne haiñ ḳhvāb kitne mahñge haiñ aur naqd-e-jāñ kyā hai tum na jaan pāoge

ai merī āñkho ye be-sūd justujū kaisī
jo ḳhvāb ḳhvāb rahīñ un kī aarzū kaisī

ab un kī ḳhvāb-gāhoñ meñ koī āvāz mat karnā
bahut thak-hār kar fōtpath par mazdūr so.e haiñ

na.e mausamoñ kī huuñ aarzū na.ī rif.atoñ kī huuñ justujū
mujhe toḌ ḳhvāb-e-jahān-e-nau maiñ tilism-e-bāb-e-ḳhayāl huuñ

ḳhvāb kā sailāb kyā guzrā nigāhoñ se mirī
ret palkoñ se jo chipkī niiñd bhī chubhne lagī

go haqīqat thā magar ai zindagī
ḳhvāb sā tū ne sadā dekhā mujhe

ḳhvāb meñ bhī safar nahīñ hotā
jism hai ab thakan se chuur itnā

durūn-e-chashm har ik ḳhvāb mar rahā hai bas
hamāre paas yahī āj-kal bachā hai bas

haiñ numāyāñ jis ke chehre par haqīqat ke nuqūsh
tere shahr-e-ḳhvāb meñ vo aadmī tanhā huuñ maiñ

ḳhvāb se paikar-e-ma.ānī tak
rūnumā haiñ alāmateñ kyā kyā