Tags-Khwab

jaane kyā TuuT gayā hai ki har ik raat mujhe
ḳhvāb meñ gumbad-o-mīnār nazar aate haiñ

ek ta.abīr bhī milī na 'ziyā'
ḳhvāb ke silsile rahe barsoñ

ḳhvāb dekhūñ to kis tarah dekhūñ
niiñd us ne mirī churā lī hai

be-fikr maiñ nahīñ ki sanam mast-e-ḳhvāb hai
kyā kyā balā karegā jo bedār hovegā

us chashm-e-nīm-ḳhvāb kī dekhe agar bahār
nargis chaman meñ taḳhta-e-dīvār hovegā

añdherī shab kā ye ḳhvāb-manzar mujhe ujāloñ se bhar rahā hai
ye raat itnī tavīl kar de ki tā-qayāmat sahar na aa.e

kis ne kah dī un se merī dāstāñ
chauñk chauñk uThte haiñ ḳhvāb-e-nāz se

ik ḳhayāl-o-ḳhvāb hai a 'shor' ye bazm-e-jahāñ
yaar aur jām-o-subū sab kuchh hai aur phir kuchh nahīñ

maiñ vahī ḳhvāb huuñ palkoñ pe sajāyā thā jise
aaj ġhairoñ kī tarah tum ne pukārā kyuuñ hai

mirī palak pe hai ehsās jaise maḳhmal sā
tumhārā ḳhvāb use chhū ke chal diyā hogā

qarya-e-hairat meñ dil kā mustaqar ik ḳhvāb hai
ye zamīñ ik aa.ina hai ye nagar ik ḳhvāb hai

tañgī-e-auqāt se khultī hai ik rāh-e-najāt
vus.at-e-imroz-o-fardā se udhar ik ḳhvāb hai

ek sub.h-e-nūr hai mere sitāre kī niyām
aur mirī be-teġh āñkhoñ kī sipar ik ḳhvāb hai

ye zamīn-o-āsmāñ donoñ haqīqat haiñ magar
ḳhaak par maujūd hone kī ḳhabar ik ḳhvāb hai

saañs ruktā hai to gul hotī hai sham-e-justujū
raat bhar bedār rahne kā samar ik ḳhvāb hai

ek mauj-e-āb hai ik aks meñ lipTī huī
ek mauj-e-rañg se shīr-o-shakar ik ḳhvāb hai

nīñdoñ meñ phir rahā huuñ use DhūñDhtā huā
shāmil jo ek ḳhvāb mire rat-jage meñ thā

vo paas aane na paa.e ki aa.ī maut kī niiñd
nasīb so ga.e masrūf-e-ḳhvāb kar ke mujhe

gudgudātā hai tasavvur chuTkiyāñ letā hai dard
kyā kisī be-ḳhvāb kī āñkhoñ meñ ḳhvāb aane ko hai

kaisī tābīr kī hasrat ki 'ziyā' barsoñ se
nā-murād āñkhoñ ne dekhā hī nahīñ ḳhvāb koī