Tags-Khwab

raat dekhe safar ke ḳhvāb bahut
pau phaTī jab to hausla na rahā

mire ḳhayāloñ meñ aaj bhī ḳhvāb ahd-e-rafta ke jāgte haiñ
tumhāre pahlū meñ kāhish-e-yād-e-āstāñ thak ke so ga.ī hai

pūchho na ham se ālam-e-ġhaflat ke ḳhvāb kī
duniyā kuchh aur hī thī hamāre shabāb kī

ye nashsha aañkh dekh ke us mast ḳhvāb kī
jaise abhī chaḌhā.ī ho botal sharāb kī

muttasil tiflī se āġhāz-e-shabāb
ḳhvāb ke āġhosh meñ bedāriyāñ

ye jab hai ki ik ḳhvāb se rishta hai hamārā
din Dhalte hī dil Dūbne lagtā hai hamārā

chāñdnī chhuptī hai takyoñ ke tale āñkhoñ meñ ḳhvāb
sone meñ un kā dupaTTa jo sarak jaatā hai

vo ḳhvāb aish-e-tarab kā jo ham ne dekhā thā
haqīqatoñ se pare thā hasīn dhokā thā

ālam-e-ḳhvāb meñ jis ko paḌhtā thā maiñ
rū-e-zebā kī le kar kitāb aa gayā

thī mere ḳhvāb se bāhar bhī duniyā
magar saarī kī saarī aur hī thī

mirī misāl to aisī hai jaise ḳhvāb koī
mirā vajūd samajh lījiye adam jaise

zinda haiñ mire ḳhvāb ye kab yaad hai mujh ko
haañ tark-e-mohabbat kā sabab yaad hai mujh ko

mahv-e-ḳhvāb haiñ saarī dekhne vaalī āñkheñ
jāgne vaalā bas ik andhā sannāTā hai

jis pal maiñ ne ghar kī imārat ḳhvāb-āsār banā.ī thī
us lamhe vīrānī ne bhī ik raftār banā.ī thī

apnī raah ke saare kāñTe maiñ ne aap hī bo.e the
varna ḳhvāb-e-azal ne duniyā kam-āzār banā.ī thī

nishān-e-rāh se baḌh kar haiñ ḳhvāb manzil ke
inheñ bachānā hai aur raah par bhī rakhnā hai

umūr-e-saltanat takrār-e-ādāb-e-shahanshāhī
murassā ḳhvāb-gāheñ masnadeñ dālān the lekin

do tarah ke ek sāġhar meñ labālab hai sharāb
ḳhvāb-ālūda nahīñ chashm-e-ḳhumārī aap kī

har ḳhvāb-e-e'tibār shikastoñ se chuur hai
dil meñ magar ġhurūr-e-tamannā ajiib hai

yaad rahtā thā nigāhoñ ko har ik ḳhvāb magar
zehn har ḳhvāb kī tābīr bhulā detā thā