Tags-Khwab

is shab-e-tīra-e-hamesha meñ
raushnī ek ḳhvāb hai so hai

ḳhvāb-e-ziyāñ haiñ umr kā ḳhvāb haiñ hāsil-e-hayāt
is kā bhī thā yaqīñ mujhe vo bhī mire gumāñ meñ thā

hazār saal bhī ġhaflat ke de nahīñ sakte
us ek lamha kī qīmat jo sirf ḳhvāb nahīñ

tum se bhī bātchīt ho dil se bhī guftugū rahe
ḳhvāb o ḳhabar kā silsila yūñhī kabhū kabhū rahe

ḳhvāb-e-hastī ko samajhne ke liye bechain huuñ
e'tibār aatā nahīñ mujh ko kisī tābīr kā

uḌ ga.ī niiñd aañkh se kis kī
lazzat-e-ḳhurd-o-ḳhvāb baaqī hai

mirī raakh meñ thiiñ kahīñ kahīñ mere ek ḳhvāb kī kirchiyāñ
mere jism-o-jāñ meñ chhupā huā tirī qurbatoñ kā ḳhayāl thā

tasvīr se ziyāda tasavvur kī umr hai
kuchh ḳhvāb zinda rahte haiñ āñkhoñ ke ba.ad bhī

dard kun se kashīd ho ga.e kyā
ḳhvāb shab se ḳharīd ho ga.e kyā

kuchal ke pheñk do āñkhoñ meñ ḳhvāb jitne haiñ
isī sabab se haiñ ham par azaab jitne haiñ

koī bhī ḳhvāb na ūñchī fasīl se utrā
magar kiran ke guzarne ko rauzan-e-dar hai

use talāsh rahī haiñ mirī udaas āñkheñ
jo ḳhvāb raat ke pichhle pahar banā huā thā

in āñkhoñ kī adam-e-dilchaspiyoñ se
hamārā ḳhvāb bojhal ho rahā hai

ye zaḳhm zaḳhm badan aur lahū lahū ye ḳhvāb
kitāb-e-jism pe utrī haiñ āyateñ terī

jhiil meñ bahte phuul kañval ke jhūTe the
ḳhvāb jo ham ne mil kar dekhe jhūTe the

vīrāñ ghar kī tārīkī meñ tanhā ḳhvāb
itne sachche kab the jitne jhūTe the

niiñd kā is ko nasha ham ko jagāne kī havas
ḳhvāb meñ aate hue niiñd churāte hue ham

pichhlī shab poñchhte āñkhoñ se purāne sabhī ḳhvāb
aglī shab ḳhvāboñ kā ambār lagāte hue ham

āñkhoñ meñ aa ke merī jo ik ḳhvāb bas gayā
phir is ke baad zindagī be-ḳhvāb sī rahī