Tags-Khwab

kin rañgoñ is sūrat kī tābīr karūñ
ḳhvāb-nadī meñ ik shola pairāk huā

aañkh dasht-e-ārzū ho jaa.e to
ḳhvāb ko dariyā meñ palnā chāhiye

ye sach hai ham ko bhī khone paḌe kuchh ḳhvāb kuchh rishte
ḳhushī is kī hai lekin halqa-e-shar se nikal aa.e

chashm be-ḳhvāb huī shahr kī vīrānī se
dil utartā hī nahīñ taḳht-e-sulaimānī se

abhī kuchh din lageñge ḳhvāb ko ta.abīr hone meñ
kisī ke dil meñ apne naam kī sham.a jalāne meñ

ik tirā ḳhvāb hī kaafī hai mire uḌne ko
rashk kartā hai mirī jaan parinda mujh se

ḳharāb sadiyoñ kī be-ḳhvābiyāñ thiiñ āñkhoñ meñ
ab in be-ant ḳhalāoñ meñ ḳhvāb kyā dete

agarche dekhe haiñ zulf-o-lab ke hasīn sapne to kyā ġhalat hai
nazar ke khetoñ meñ ḳhvāb bone kī hasrateñ bhī na.ī nahīñ haiñ

ik thakā ḳhvāb ki siine meñ sulagtā hai abhī
ik dabī yaad ki hai nīsh-e-rag-e-jāñ yaaro

vo ek ḳhvāb ki ta.abīr pā sakā na abhī
vo ik ḳhayāl ki sahrā-navard ab tak hai

ḳhvāb ke nashshe meñ jhuktī jā.egī chashm-e-qamar
raat kī āñkhoñ meñ phailī iltijā rah jā.egī

hai iḳhtiyār meñ jitnā tire tū utnā to kar
na mil sake koī ta.abīr, un ko ḳhvāb to de

saath chhūTe the saath chhūTe haiñ
ḳhvāb TuuTe the ḳhvāb TuuTe haiñ

mujhe to jo bhī milā hai azaab kī sūrat
mirī hayāt hai ik tishna ḳhvāb kī sūrat

ālam-e-furqat meñ zikr-e-ḳhvāb kyā
niiñd ḳhud bedār hai tere baġhair

avval avval bol rahe the ḳhvāb-bharī hairānī meñ
phir ham donoñ chale ga.e pātāl se gahre raaz meñ chup

ḳhvāb-sarā-e-zāt meñ zinda ek to sūrat aisī hai
jaise koī devī baiThī ho hujra-e-rāz-o-niyāz meñ chup

mirī to dastaras meñ ḳhvāb tak rahe na the mire
ye kyā huā zamāna mere saath kaise ho gayā

aaj to saare baaġh meñ ḳhvāb-e-marg kā nashsha taarī hai
lekin koī jaag rahā hai so.e hue daraḳhtoñ meñ

apnā har ḳhvāb thā ik mauj-e-surūr
yuuñ huī umr basar ḳhvāboñ meñ