Tags-Khwab

tū mirā ḳhvāb hai sardī kī kisī raat kā ḳhvāb
sard hai jis meñ badan ruuh kā paara hai bahut

lahad meñ chain miltā hai kahāñ zahmat-nasīboñ ko
jhapaktī hī nahīñ āñkheñ mirī ḳhvāb-e-girāñ kaisā

kis kī jānib nigarāñ haiñ mirī be-ḳhvāb āñkheñ
kyā koī marhala-e-umr-e-ravāñ baaqī hai

kho chuke lutf-e-sahar-ḳhezī garāñ ḳhvāb-e-makīn
sub.h-dam band darīchoñ meñ sabā kyā aa.e

ḳhvāb aur ālam-e-bedārī meñ
ret par ret kā ghar yaad aayā

dikhā kar ḳhvāb-e-ḳhush-ā.inda firdaus-ḳhayālī ke
na.e shaddād ham ma.asūm insānoñ ko le Duube

koī yaad phir dil meñ aa kar basī hai mahak sī huī hai
koī ḳhvāb āñkhoñ meñ phir pal rahā hai diyā jal rahā hai

makāñ badalte hue reza reza kar Daale
purāne ḳhvāb the tasvīr bhī purānī thī

aaj to din bhar tirī tasvīr ham dekhā kiye
ya.anī apne ḳhvāb kī ta.abīr ham dekhā kiye

āñkhoñ se chhin jaa.eñ ik ik ḳhvāb magar
us kī talab dil kā dhuāñ baaqī rahe

jo mere lahje meñ ab bhī ḳhumār hai 'sādiq'
kisī se ḳhvāb meñ kar lī thī guftugū maiñ ne

hasrat-e-nazzārgī bhaTkegī har har gaam par
ḳhvāb hoñge aur ta.abīreñ chhupā dī jā.eñgī

ye shab-e-guzishta dekhā vo ḳhafā se kuchh haiñ goyā
kaheñ haq kare ki hove ye hamārā ḳhvāb ulTā

chunarī talāsh karne meñ kuchh der ho ga.ī
dar par khaḌā huā thā jo ik ḳhvāb mar gayā

ajiib ḳhvāb dikhāte haiñ nā-ḳhudā ham ko
ġharaz ye hai ki safīna kināre jā na lage

na sah sakā jab masāfatoñ ke azaab saare
to kar ga.e kuuch merī āñkhoñ se ḳhvāb saare

ḳhvāb to ḳhvāb haiñ pal bhar meñ bikhar jaate haiñ
sach to ye hai ki bas ik kāhish-e-jāñ raqs meñ hai

ban kar lahū yaqīn na aa.e to dekh leñ
Tapkī haiñ pā-e-ḳhvāb se sahrā kī vus.ateñ

usī kā ḳhvāb hai merī navā-e-ḳhvāb 'na.īm'
mirā vajūd bhī us se alāhada kyā hai