Tags-Khwab

sher aa ke chiir phaaḌ gayā mujh ko ḳhvāb meñ
dam-bhar ko merī aañkh lagī thī machān par

ḳhālī paḌī haiñ bed kī bīmār kursiyāñ
ḳhūñ-ḳhvāb-dhūp-dhund barastī hai lawn par

vo ḳhvāb dekh rahī thiiñ ye jāgtī āñhkeñ
charāg ḳhud nahīñ bujhtā to maiñ bujhā detā

mujhe rañg-e-ḳhvāb se zindagī kā yaqīñ milā
kabhī dil dukhā to kuchh aur bhī vo qarīñ milā

sar-e-ḳhvāb hī kabhī tum bhī to mujhe dekhte
vo tilism thā ki falak bhī zer-e-nagīñ milā

ham bulāte vo tashrīf laate rahe
ḳhvāb meñ ye karāmāt hotī rahī

ik husn-e-nīm-ḳhvāb kā aalam hī aur hai
soī huī adā ko jagāne meñ kuchh nahīñ

har ḳhvāb kaalī raat ke sāñche meñ Dhaal kar
ye kaun chhup gayā hai sitāre uchhāl kar

kyā jaane kis ne oḌhā merā paikar
maiñ ḳhvāb-e-ḳhargosh añdherī raat

zindagī saaz hai is saaz pe naġhme chheḌo
tum bhī kuchh ḳhvāb buno giit sunātī hai havā

raat ke pichhle pahar ḳhvāb-libāda taj kar
aaj tum ḳhud se milo giit sunātī hai havā

pahle purvā.ī se dil meñ ek kasak sī uThtī thī
ab ye mausam kuchh nahīñ karte lekin ḳhvāb dikhāte haiñ

jo bhī us se miltā hai ḳhvāb bunñe lagtā hai
kaun jaane kis kis se us ne kyā kahā hogā

ḳhvāb āsmānoñ ke dekhne lagīñ 'parvīñ'
aise hī sitāre par naam rakh diyā hogā

ḳhulūs-o-mehr-o-vafā ḳhvāb ho ga.e jaise
na jaane kab ye nahūsat kā raaj badlegā

dekhī thī zulf raat kisī kī maiñ ḳhvāb meñ
ab tak hai baal baal mirā pech-o-tāb meñ

qaa.em hai ye bhī taur koī zindagī kā yaañ
guzrī tamām umr tirī ḳhūr-o-ḳhvāb meñ

aisī rāteñ ki jinheñ niiñd kī lazzat na milī
aisī āñhkeñ jo abhī ḳhvāb se nā-vāqif haiñ

kahāñ vo shakleñ kahāñ vo bāteñ kahāñ vo jalse kahāñ vo mahfil
ye sab kā sab ḳhvāb kā thā sāmāñ chhupā liyā bas dikhā dikhā kar

roz ik ḳhvāb-e-musalsal aur maiñ
raat bhar yādoñ kā jañgal aur maiñ