Tags-Khwab

haa.e vo log ga.e chāñd se milne aur phir
apne hī TuuTe hue ḳhvāb uThā kar le aa.e

ḳhvāb meñ lazzat-e-yak-ḳhvāb hai duniyā merī
aur mire falsafī asbāb uThā kar le aa.e

haiñ sabhī banjar ḳhayāl-o-ḳhvāb kī zebā.iyāñ
haañ bas itnā hai ki zeb-e-dāstāñ koī to hai

bayāñ ḳhvāb kī tarah jo kar rahā hai
ye qissa hai jab kā ki 'ātish' javāñ thā

be-kaif kaT rahī thī musalsal ye zindagī
phir ḳhvāb meñ vo ḳhvāb sā paikar milā mujhe

ye ḳhvāb hī mirī tanhā.iyoñ kā hāsil thā
ye ḳhvāb hī mirī tanhā.iyāñ baḌhātā thā

vaise milnā nā-mumkin hai
ḳhvāb meñ aayā jā saktā hai

sanam kī zulfāñ ko hijr meñ ab ga.e haiñ mujh nain haiñ ḳhvāb rāhat
lage hai kāñTā nazar meñ sonā kaTeñgī kaise ye kaalī ratiyāñ

ḳhvāb pairoñ tale shānoñ pe hai zimme-dārī
ham ko uḌnā bhī hai pañkhoñ ko nikalnā bhī nahīñ

ghar meñ to ab kyā rakkhā hai vaise aao talāsh kareñ
shāyad koī ḳhvāb paḌā ho idhar udhar kisī kone meñ

vaqt mahñgā ho rahā thā lafz bhī kamyāb the
shā.iroñ ko ḳhvāb bunñe meñ bhī āsānī na thī

ai junūñ chal ḳham-e-gesū kī taraf dil to abhī
ālam-e-ḳhvāb meñ ādāb ke pechāk meñ hai

band ho jaa.e agar rauzan-e-imkān-e-ḳhayāl
ḳhvāb khulte haiñ mire dil meñ farāvānī se

natīja apnī aahoñ kā hai shakl-e-mustavī puurā
hayūlā sūrat-e-kābūs phir ḳhvāb-e-girāñ kyuuñ ho

āñkhoñ āñkhoñ hariyālī ke ḳhvāb dikhā.ī dene lage
ham aise ka.ī jāgne vaale niiñd hue sahrāoñ kī

hijr ke phuul meñ vo chehra-e-zarrīñ dekhūñ
vasl ke ḳhvāb ko milne kā ishāra na kahūñ

kuchh aur der Thahar jaao ḳhvāb-zāroñ meñ
vo aks hī sahī lekin nazar to aa.egā

niiñd kyuuñ nahīñ aatī ḳhvāb ḳhvāb āñkhoñ ko
shahr-e-jāñ meñ har jānib kyuuñ ye rat-jagā sā hai

jaag rahī hai rūh-e-āhan ḳhvāb meñ hai insāñ kā zamīr
bedārī kī sau lahreñ haiñ phir bhī ye duniyā niiñd meñ hai

inqalāb ek ḳhvāb hai so hai
dil kī duniyā ḳharāb hai so hai