Tags-Khwab

ik safar dasht-e-ḳharābī se sarāboñ tak hai
aañkh kholī to jahāñ ḳhvāb kā manzar niklā

raat aatī hai to tāqoñ meñ jalāte haiñ charāġh
ḳhvāb zinda haiñ so āñkhoñ meñ jalāte haiñ charāġh

jo puure hone se rah ga.e the vo ḳhvāb rakkhe hue haiñ ghar meñ
yaqīn maano purānī rut ke gulāb rakkhe hue haiñ ghar meñ

lab-e-jāñ-baḳhsh-e-jānāñ kab ijāzat deñge marne kī
qayāmat tak na dekheñge qadam ḳhvāb-e-adam tere

jis taraf nazar kiije vahshatoñ kā sāmāñ hai
zindagī hī kyā ab to ḳhvāb tak pareshāñ hai

dekhne se jise āñkhoñ meñ añdherā chhāyā
kis ko is ḳhvāb kī ta.abīr batā dī jaa.e

jab muqaddar hai shab-o-roz kī be-kaifī 'sabā'
ḳhvāb kī tarah har ik yaad bhulā dī jaa.e

hamāre ḳhvāb kuchh in.ikās lagtā hai
ye aadmī to hameñ rū-shanās lagtā hai

'kaifī' kab tak ye ḳhvāb-e-ġhaflat
mehr lab-e-bām ho chukā hai

qatl karnā hai na.e ḳhvāb kā so Dartā huuñ
kaañp jaa.eñ na mire haath ye ḳhuuñ karte hue

maand paḌte jā rahe the ḳhvāb-tasvīroñ ke rañg
raat utartī jā rahī thī dard kī dīvār se

ki maañ ḳhvāb meñ māthā sahlā rahī thī
Darūñ kyā maiñ ab bad-duā bad-nazar se

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kabhī vo aa bhī sakeñge hameñ yaqīñ to na thā
mile jo ḳhvāb meñ kuchh e'tibār hone lagā

jin ḳhvāboñ se niind uḌ jaa.e aise ḳhvāb sajā.e kaun
ik pal jhūTī taskīñ pā kar saarī raat gañvā.e kaun

sochtā huuñ ki tasavvur ko sameTūñ kaise
bistar-e-ḳhvāb pe bhī aañkh khulī rah ga.ī hai

manzar tamām aaj tak āñkhoñ pe bojh haiñ
jitne bhī ḳhvāb haiñ mirī palkoñ pe bojh haiñ

ai dil kabhī patthar bhī kahīñ mom hue haiñ
jo ḳhvāb meñ dekhā hai kahīñ sach bhī huā hai

kis tarah na fariyād kā phailā.eñ ye dāman
tum gul ho ki har ḳhvāb-e-anādil meñ paḌe ho

kaan meñ mere chupke chupke kaun ye kahtā hai 'ishqī'
har din duniyā vahī purānī har shab ḳhvāb nayā sā.īñ